BQO ákimi kóktemgi sý tasqynyn qapysyz ótkizýdi tapsyrdy
ORAL. QazAqparat - Batys Qazaqstan oblysynda kóktemgi sý tasqyny negizinen qalypty ótýde. Bul týraly búgin oblys ákimi Altaı Kólginovke BQO TJ departamentiniń bastyǵy Jasulan Jumashev málim etti, dep habarlaıdy «QazAqparat» HAA tilshisi.
Onyń aıtýynsha, TJ jasaǵy demalys kúnderi Bykovka, Rýbejka ózenderi men Oral qalasy tóńiregindegi Vetelkıde bolsa, qazir Zelenov aýdanyndaǵy Hamıno, Qaztalovqa qarasty Jalpaqtal aýyldary baqylaýǵa alynǵan. Qaraózen sýynyń kóterilýine baılanysty Jalpaqtal aýylynda bes úı bólinip qalǵan, soǵan baılanysty TJ qyzmetkerleri turǵyndar men balalardy kún saıyn qaıyqpen tasymaldaýda.
Oblys basshysynyń tapsyrmasyna sáıkes BQO TJ departamentiniń bastyǵy kórshiles Orynbor oblysynyń birinshi vıtse-gýbernatory, sol óńir úkimeti tóraǵasynyń birinshi orynbasary Sergeı Balykınmen kezdesken. Reseılikterdiń sózine qaraǵanda, olar Jaıyq ózenine keletin negizgi sýdy Irıkla sý qoımasynan emes, Buzulyqtan kútýde. Bıylǵy qar qory ótken jylǵydan edáýir az.
«Qazsýshar» RMK BQO fılıalynyń málimeti boıynsha Orynbordaǵy Irıkla sý qoımasynan qazir sekýndyna 25 tekshe metr (ótken jyly osy ýaqytta 90 tekshe metr, aldyńǵy jyly 30 tekshe metr) sý jiberilýde. Al Saratov oblysy Aleksandrov Gaı aýdanyndaǵy Saryózen boıynda ornalasqan Varfolomeev sý qoımasynan sý jiberilip jatqan joq.
Altaı Kólginov kóktemgi sý tasqynyn qapysyz ótkizýdi, sonymen qatar ony aýyl sharýashylyǵy maqsatyna paıdalanyp qalý sharalaryn alýdy tapsyrdy. Osyǵan oraı TJ departamentiniń bastyǵy J.Jumashev taıaý kúnderi Qaztalov pen Jańaqala aýdandaryna jumys saparymen baryp, Qaraózen men Saryózendegi jaǵdaıdy kózben kórip, málimdeıtin boldy. Basqa da ózen-sýlar jiti baqylaýda bolmaq. Mysaly, Derkól ózeninde sý kóterilip, sonyń áserinen Shaǵan tolyqty. Al óńirdiń bas ózeni Jaıyqtyń tasýy ádettegideı mamyrdyń basy emes, sáýirdiń aıaǵynda bolady dep kútilýde. Mundaǵy qaýipti mólsher 8 metr bolsa, bıyl shamamen 600-den 650 santımetrge deıin kóteriledi dep boljanýda.
