BQO ákimi KKC-Sicim jumysshylarynyń narazylyǵy týraly: Talaptary orynsyz
«Aqsaıda KKC-Sicim degen kompanııa bar. Kompanııa Qarashyǵanaq ken oryndarynda jumys isteıtin edi. Búgingi kúnde olardyń talaptary - jalaqyny 50 paıyz kóterý. Árıne, kompanııanyń basshylary olarmen kezdesti - kompanııanyń basshy orynbasarlary keshke kelip, tańerteń kezdesti. Jumysshylardyń qoıyp otyrǵan talaptaryn, máselelerin tyńdady. Olar 50 paıyzǵa, keı jaǵdaılarda 100 paıyzǵa jalaqy kóterý máselesin kóterip otyr. Munyń bári zań aıasynda qaralady», - dedi ol Úkimet kýlýarynda.
Onyń aıtýyna qaraǵanda, atalǵan kompanııada 3 myńǵa jýyq adam jumys isteıdi.
«Meniń oıymsha, talaptary orynsyz. Sebebi olardyń eki ortada ujymdyq kelisimsharty bar. Onyń syrtynda árbirimen, jumys berýshi men jumysshynyń arasynda jeke kelisimsharttar bar. Sondyqtan sol kelisimsharttarda qaralǵan mindettemelerde jalaqyny 50 nemese 100 paıyz kóterý degen joq. Qysqasha aıtqanda, olardyń kelisimshartynda aılyqty 20 paıyz kóterý máselesi aıtylǵan. Sondyqtan men sol mindettemelerge súıenip aıtyp otyrmyn. Ol jerde ortasha jalaqy 280 myń teńgeniń aınalasynda.
Erteń keshke kompanııanyń eń úlken basshysy Italııadan keledi. Sol kelgen soń jumysshylarmen taǵy kezdesedi. Zań talaptary boıynsha olar jumysqa shyǵýy kerek. Olar jumysqa qazir barǵan joq. Sebebi ózderiniń kelisimsharttarynda qaralmaǵan jalaqyny surap otyr. Sondyqtan bul jerde zańǵa sáıkes sharalar qabyldanady. Ol jerde 3 myńǵa jýyq adam jumys isteıdi», - dedi oblys ákimi.
Eske salaıyq, keshe Batys Qazaqstan oblysynda 500 qyzmetker jumysqa shyǵýdan bas tartqanyn, keıin bul máselege qatysty óńir ákimdigi túsinik bergenin jazǵan edik.
