BQO ákimi kásipkerlermen aptasyna bir ret kezdesip turmaq
ORAL. QazAqparat - Kásipkerlermen kezdesýler turaqty sıpat alyp, olarǵa qoldaý kórsetiledi. Bul týraly búgin oblys ákimi Altaı Kólginov óńirlik kásipkerler palatasynda kásipkerlerdi qabyldaǵan kezde málim etti, dep habarlaıdy «QazAqparat» tilshisi.
Kásipkerlerdiń bastamasymen mundaı kezdesý alǵash ret uıymdastyrylyp otyr. Olar jumys barysynda kezdesetin qıyndyqtar men óz joba-josparlary jóninde óńir basshysyna tikeleı aıtýǵa múmkindik aldy. 
Kezdesýde, mysaly, kólik-logıstıkalyq ınfraqurylymdy damytý, Eýropa men Qazaqstan arasyndaǵy kólik qyzmetiniń yqpaldastyǵy máselesi qozǵaldy. Qazirgi tańda Teńiz, Qashaǵan, Qarashyǵanaqtaǵy iri qazaqstandyq jobalardy júzege asyrý kezinde ken ıgerýshi kompanııalardyń jergilikti kásipkerlerdi qosalqy merdigerlikke tartatyny jasyryn emes. Sondyqtan olarmen tikeleı jumys jasaıtyn ýaqyt jetti. Osy oraıda úsh jyldan beri Eýropadaǵy júk tasymaldaýshylarmen qosalqy merdiger retinde jumys jasaıtyn «KREISS ASIA» JShS-nyń dırektory Nurbolat Jumaǵalıev jer qoınaýyn paıdalanýshylar jobalaryn keńeıtýge baǵyt ustap otyrǵan mezgilde sol iri kompanııalarmen kezdesý uıymdastyryp, jergilikti kásipkerlerdiń keńeıtiletin jobalarǵa qatysýyn qamtamasyz etýmen shuǵyldanatyn jumys tobyn qurý qajettigin jetkizdi.
Sol sekildi Oral qalasynyń geografııalyq ornalasýyn, Aqtaý teńiz portynyń damýyn, Teńiz jáne Qarashyǵanaq jobalarynyń keńeıýin eskere otyryp, óńirde kólik-logıstıkalyq ortalyq qurý ózekti bola túsýde. Óńir basshysynyń oıynsha, bul - kásipkerler úshin qosymsha múmkindikter. Qazirdiń ózinde jospar bar, jer telimi bólingen, ınvestor ortalyq qurylysyn salýǵa bıyl kirispek.
Ákimniń qabyldaýyna kelgen «Oralmedregıon» JShS basshysy Andreı Pavlov pen «Olımp» klınıkalyq dıagnostıkalyq zerthanalar jelisiniń dırektory Erlan Súleımenov densaýlyq saqtaý salasyndaǵy jergilikti úlesti kóbeıtý, memlekettik-jekemenshik áriptestikti damytý, osy oraıda ákimshilik kedergilerdi boldyrmaý jónindegi oılarymen bólisti.
«Jaıyq paraǵy» JShS dırektory Aslanbek Súndetov Oral qalasynda A-4 formatyndaǵy qaǵaz óndirisin jolǵa qoıý úshin 40 mln. teńge kerek ekendigin baıan etti. Ol memleket tarapynan demeýqarjy men kepildendirýge qol jetkizgisi keledi. Bul jobany «Damý» qorynyń qoldaýymen júzege asyrýǵa bolady, biraq qaǵaz naryǵynda áýelden orny bar kompanııalarmen básekelestiktiń ońaıǵa túspeıtindigin eskerý de qajet.
«Mundaı kezdesýlerdi biz aptasyna bir ret ótkizýdi kózdep otyrmyz. Bul ózara pikir alysatyn naqty is alańyna aınalýy kerek. Oǵan kez kelgen kásipker kelip, óz usynysyn bildire alady. Qazirgi tańda memlekettik-jeke menshik áriptestikti damytýdyń mańyzy zor. Sondyqtan óńirlik kásipkerler palatasymen birlese otyryp, kásipkerlerge jan-jaqty qoldaý kórsetetin bolamyz. Elbasymyz bınzestiń básekege qabiletti bolýy úshin barlyq jaǵdaıdy jasap otyr. Sony biz jergilikti jerde júzege asyra bilýimiz kerek», dedi Altaı Kólginov.
