BQO ákimi kapıtan A.Kereevtiń otbasyna kóńil aıtty
ORAL. 7 maýsym. QazAqparat - 7 maýsym kúni oblys ákimi Nurlan Noǵaev Tasqala aýdanynyń Mereı aýylyna baryp, «Arqankergen» shekara zastavasynda qaza bolǵan batysqazaqstandyq shekarashy ofıtser Altynbek Kereevtiń ata-anasyna jáne týma-týystaryna kóńil aıtty.
Oblys ákimi atap ótkenindeı, qaraly habardy estigennen keıin búkil Qazaqstan halqymen birge batysqazaqstandyqtar da qaıǵyrdy. Qyrshynynan qıylǵan jas jigitterdiń qazasy Otan aldyndaǵy boryshtaryn ótep júrgende oryn aldy. «Árıne, qaza qıyn, osy jerde ósip-ónip, bilim alyp, talpynyp, áskerı qyzmetke baryp, 28 jasynda ortamyzdan ketti. Tiri adam tirligin jasaıdy, bekem bolyńyzdar. Qaıǵyly habar qulaqtaryna tıisimen bizge jan-jaqtan biraz azamattar habarlasyp, sizderge óz attarynan kóńil aıtýdy surady. QR Parlamenti Májilisiniń Nurlan Nyǵmatýllın, Baqtyqoja Іzmuhambetov, Sergeı Dıachenko bastaǵan basshylyǵy solardyń qatarynda. Parlament depýtattary bir kúndik jalaqylaryn arnaıy qorǵa aýdaryp, sodan túsken 200 myń teńgeni sizderge berýimizdi surady. Odan bólek oblys ákimdigi tarapynan 1 mıllıon teńge qarjylaı kómegimizdi qabyl alyńyzdar. Kómek osymen shektelip qalmaıdy. Aldaǵy ýaqytta da qoldap, járdem kórsetip otyratyn bolamyz», - dedi ákim.
Qaza bolǵan shekarashy ofıtserdiń ata-anasyna kóńil aıta kelgen «Nur Otan» HDP BQO fılıaly tóraǵasynyń orynbasary Aqqalı Áýbekerov te oblystaǵy partııa músheleri atynan 200 myń teńge qarjylaı kómek usyndy.
