BQO ákimi beıbitshilik pen tynyshtyqtyń qadirin baǵalaı bilýge shaqyrdy

ORAL. QazAqparat – Batys Qazaqstan oblysynyń ákimi Ǵalı Esqalıev beıbitshilik pen tynyshtyqtyń qadirin baǵalaı bilýge shaqyrdy, dep habarlaıdy QazAqparat tilshisi.

Ákimniń málimdegenindeı, 4 qańtar kúni Oral qalasynyń Abaı alańynda ruqsat etilmegen mıtıng qatysýshylary tarapynan arandatý áreketterge jol berildi.

Nátıjesinde, quqyq qorǵaý organdary zańsyz áreketterge jol bergen azamattarǵa qatysty tıisti shara qoldandy.

«Qadirli jerlester, qoǵamnyń turaqtylyǵy men birligine nuqsan keltirýge tyrysyp júrgen destrýktıvti toptarǵa ermeýińizdi suraımyn. Ásirese, jastarǵa jeke toqtalǵym keledi: týma-týystaryńyzdy oılap, bolashaqtaryńyzǵa balta shappańyzdar.

Biz turaqtylyq pen azamattardyń tynyshtyǵy jolynda kez kelgen kelissózge daıynbyz. Barlyq zańdy talaptar eskeriletinin jáne mańyzdy máseleler tek beıbit kelissózder arqyly sheshiletinin aıtqym keledi.

Óńir turǵyndary osy synnan súrinbeı ótip, jappaı tártipsizdik pen zańǵa qaıshy is-áreketerge jol bermeıdi dep senemin.

Jerlesterdi sabyrlylyqqa, qoǵam men memleketimizge qarsy jumys jasaıtyn túrli arandatýshylarǵa toıtarys berýge shaqyramyn.

Beıbitshilik pen tynyshtyqtyń qadirin baǵalaı bileıik» delingen úndeýde.