BQO ákimi bataly aqsaqaldarmen kezdesti
ORAL. QazAqparat - Búgin Alǵys aıtý kúnine oraı oblys ákimi Altaı Kólginov bataly aqsaqaldarmen kezdesti, dep habarlaıdy «QazAqparat» tilshisi.
Oblys ardagerlerin merekemen quttyqtaǵan óńir basshysy Alǵys aıtý kúni taǵdyr tálkegimen Qazaqstanǵa qonys aýdarǵan túrli ult ókilderiniń qazaq eline rızalyǵyn bildirý arqyly ózara túsinistigimiz ben syılastyǵymyzdy barsha jurtqa pash etetin kún ekendigin jetkizdi.
«Memleket basshysy Nursultan Ábishuly Nazarbaev elimiz táýelsizdik alǵan bastapqy kezeńde-aq Qazaqstan halqy Assambleıasyn quryp, halyqty birlikke, tatýlyqqa shaqyrǵan bolatyn. Sondyqtan 1 naýryz Assambleıa kúni retinde de atalyp ótedi. Bizder osy dostyq pen birlik týyn bıik ustap, halqymyzdyń meıirbandyq syndy asyl qasıetterin qasterleı, baıyta bilýimiz kerek. Qazaq eli yntymaǵymen alǵa basyp, bereke-birligimen ozatyn bolady. Osy oraıda eń aldymen keıingi urpaqqa jol siltep, úlgi-ónegesin kórsetip otyrǵan aqsaqaldarǵa, barsha aǵaıynǵa alǵysymyzdy arnaımyz», dedi Altaı Kólginov.
Jıynda Qazaqstan halqy BQO assambleıasy janyndaǵy aqsaqaldar keńesiniń múshesi, orys ultynyń ókili Vasılıı Baev, sondaı-aq koreı Grıgorıı Te, tatar Zakır Hýzasaıtov, belarýs Anastasııa Safına, «Vaınah» sheshen-ıngýsh etnomádenı ortalyǵynyń tóraǵasy Danılbek Saratov Qazaq eline degen shynaıy yqylas-tilekterin aıtyp, san ulttyń basyn qosyp, alǵa bastap kele jatqan Elbasy saıasatyn qoldaıtyndyqtaryn bildirdi. Bataly sózder de aıtyldy.
Shara sońynda qatysýshylarǵa oblys ákiminiń alǵyshattary tabys etildi.
Alǵys aıtý kúnine oraı jańa alańda merekelik kontsert te qoıyldy.
