BQO ákimi «Ashyq ákimdik» sharasynda turǵyndardy qabyldady
ORAL. QazAqparat - Búgin Batys Qazaqstan oblysynyń ákimi Altaı Kólginov oblystyq qazaq drama teatrynyń foıesinde «Ashyq ákimdik» sharasy barysynda turǵyndardy qabyldady, dep habarlaıdy «QazAqparat» HAA tilshisi.
Barlyǵy 17 turǵyn óńir basshysyna PIK-terdiń jumysy, jer kezegi jáne turǵyn úı máselelerimen jolyqty.
Oblystyq ishki saıasat basqarmasynan túsken málimetke qaraǵanda, bul joly shara kezinde 41 memlekettik uıym, quqyq qorǵaý organdary, 11 kommýnaldyq mekemeniń basshy-qyzmetkerleri 242 adamdy qabyldap, keńes berdi. Sonyń ishinde 44-i oblystyq jer qatynastary basqarmasyna, 23-i energetıka jáne turǵyn úı-kommýnaldyq sharýashylyq basqarmasyna, 16-sy jergilikti polıtsııa qyzmetine, 15-i BQO memlekettik kirister departamentine júgindi. 40 adam turǵyn úı máseleleri boıynsha keldi.
Turǵyndar mundaı qabyldaýdyń senbi kúni ótkizilýi ózderi úshin qolaıly ekendigin jetkizdi.
Aıta keteıik, BQO ákimdigi «Ashyq ákimdik» atty ashyq esik kúnin osymen ekinshi ret uıymdastyryp otyr. Budan buryn 4 aqpan kúngi sharaǵa 311 adam kelip, barlyǵy 34 oblystyq mekeme-uıymnyń, oǵan qosa Oral qalasy ákimdigi bólimderiniń basshylary men qyzmetkerlerinen keńes alǵan bolatyn. 
