BQO ákimi Aq Jaıyq jurtshylyǵyn Naýryz merekesimen quttyqtady

ORAL. QazAqparat - Batys Qazaqstan oblysynyń ákimi Altaı Kólginov Aq Jaıyq jurtshylyǵyn Naýryz merekesimen quttyqtady, dep habarlaıdy «QazAqparat» HAA tilshisi.

«Barshańyzdy áz-Naýryz merekesimen shyn júrekten quttyqtaımyn!

Bıylǵy jańa jyldy Qazaqstanymyzdyń úshinshi jańǵyrýynyń tarıhı kýágerleri retinde bas qosyp, qarsy alýdamyz.

Elbasy Nursultan Ábishuly Nazarbaev atap kórsetkendeı, «Uly maqsattardy óziniń aldyna uly halyq qana qoıa alady!». Mundaı qaryshty qadamǵa jaqynda ǵana Elbasy qol qoıǵan memleketimiz úshin máni zor dáýirlik sheshim Ata Zańymyzǵa ózgerister men tolyqtyrýlar engizý týraly zań jol ashady. Sóıtip, Otanymyzdyń basty qujaty kemeldene tústi.

Bıylǵy Naýryz barshaǵa búkilhalyqtyq serpin ákeldi. Óıtkeni halyqtyń, memlekettiń júregi - Astana búkil dúnıejúzine qushaǵyn aıqara ashyp, «EKSPO» arqyly elimizdiń atyn taǵy da bir ret aıdaı álemge pash etedi. Osyndaı bastamalardyń ózinen-aq memleketimizdiń bolashaǵy jarqyn, tuǵyry berik ekenin ańǵarýǵa bolady.  Osy bereke-birlik, yrys-yntymaq Naýryz merekesinde jarasymdy kórinisin taýyp keledi.

Naýryz merekesinde adamdar bir-birine qushaq jaıyp kórisedi, ókpe-nazdy keshirisedi. «Atadan mal qalǵansha, tal qalsyn» dep kóshet otyrǵyzady. Osy kúni tilegen tilek túgel qabyl bolady dep kámil senedi.

Árbir otbasyna, árqaısysyńyzǵa sarqylmas baqyt tileımin. Ulys oń, aq mol bolsyn!», delingen quttyqtaýda.