BQO ákimdigi qańǵybas ıttermen kúreske taǵy 8 mln teńge bóledi

NUR-SULTAN. QazAqparat –Batys Qazaqstan oblysynyń ákimi Ǵalı Esqalıev óńirde qańǵybas ıtterdiń máselesi ótkir ekenin málim etti, dep habarlaıdy QazAqparat tilshisi.

«Óńirde qańǵybas ıtter máselesi ótkir tur. Qańǵybas ıtterdi aýlaý, chıp taǵý jáne sterıldeýge qatysty veterenarlyq qyzmetti memlekettik-jekeshelik áriptestik quzyretine bergenbiz. Bul baǵyttaǵy jumys 2 jyl boıy qarqyndy júrip keledi. Qańǵybas ıtter turǵyndardyń ómirine qaýip tóndirse «109» qyzmetine habarlasyp, aıta alady. Ortalyqqa kelip túsken shaǵymdarǵa qatysty shuǵyl sheshim qabyldanady. Top bolyp júretin ıtterdi aýlap, adam ómirine qaýip tóndirgen jaǵdaıda kózin joıý sharasy qoldanylady», - dedi Ǵalı Esqalıev Ortalyq kommýnıkatsııalar qyzmeti alańynda ótken baspasóz máslıhatynda.

Aımaq basshysynyń málimetinshe, aýlanǵan buralqy ıtterdiń 20-25 paıyzynyń kózi joıylady. Qalǵanyn emdep, sterıldep, chıp taǵyp, qaıta bosatady.

«Qańǵybas ıtterdi aýlaý máselesi qalalyq máslıhatta qaralyp, qosymsha qarjy bólinedi. Óıtkeni, turǵyndardan kelip túsetin shaǵym sany artyp otyr. Bizdiń óńirde qańǵybas ıttermen kúresýde úlgi tutatyndaı aýdandar da bar. Ol jerde ıtterdi arnaıy orynda ustap, kútip-baptaıdy. Itterdi aýlap, olarǵa veterınarlyq qyzmet kórsetý boıynsha 3 jylǵa arnalǵan baıqaý ótti. Jobanyń quny 61 mln teńgeni quraıdy. Qosymsha taǵy 8 mln teńge bólinetin bolady», - deıdi ol.

Buǵan deıin BQO ákimi qurylysy aıaqsyz qalǵan tergeý ızolıatorynyń ǵımaraty boıynsha túsinik berdi.

Odan bólek, óńir basshysy tok uryp eki qolynan aırylǵan 5 jasar balanyń taǵdyryna qatysty aıtty.