BQO: 7,1 mln teńge jymqyrǵan avtomobıl joldary bóliminiń basshysy ustaldy
Bul týraly QazAqparat Memlekettik qyzmet isteri jáne sybaılas jemqorlyqqa qarsy kúres agenttigine siltememen habarlaıdy.
«2018 jyldyń 5 qyrkúıeginde agenttiktiń BQO-daǵy Ulttyq bıýrosy Terekti aýdandyq ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysyn qylmys ústinde ustady. Kúdikti «Terekti aýdany Fedorovka kenti Áıtıev kóshesiniń jolyn jóndeý» obektisi boıynsha memlekettik satyp alý týraly atqarylǵan jumystar aktisine qol qoıǵan jáne jalpy «qamqorlyǵy» úshin óziniń qyzmettik kabınetinde merdiger uıymnan 100 myń teńge aqsha qarajatyn alǵan», - dep habarlady agenttiktiń baspasóz qyzmeti.
Buǵan deıin merdiger uıymnyń Terekti aýdany ishindegi avtokólik joldaryn jóndeý jáne kútý boıynsha tenderdi utyp alǵandyǵy jáne Terekti aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimimen memlekettik qyzmetter týraly tıisti kelisimshartqa otyrǵandyǵy anyqtaldy.
«Іs júzinde atalǵan kelisimshart boıynsha jumystar júrgizilmegen, al aqshalaı qarajatty tolyqtaı merdiger uıymynyń basshysy 2017 jyldyń maýsym aıynan bastap 2018 jyldyń aqpany aralyǵynda bólik-bóligimen memlekettik mekeme basshysyna berip otyrǵan. Bólim basshysyna 7,1 mln teńgeni jymqyrdy degen kúdik taǵyldy», - delingen resmı habarlamada.
7 qyrkúıek kúni sheneýnik qamaýǵa alyndy. Qazirgi ýaqytta is boıynsha sotqa deıingi tergeý amaldary júrip jatyr.