BQO: 2017 jyly Jańaqala aýylynda birqatar áleýmettik nysan boı kóteredi
ORAL. QazAqparat - Bıyl Jańaqala aýdany ortalyǵy Jańaqala aýylynda 280 oryndyq jańa balabaqsha salý josparlanýda.
Bul týraly aýdan ákimi Lavr Haıretdınov málim etti, dep habarlaıdy «QazAqparat» HAA tilshisi.
Lavr Rashıdulynyń aıtýynsha, atalmysh balabaqsha ǵımaratynyń jobalaý-smetalyq qujattamasy jasalyp qoıǵan. Quny - 662 mln. teńge. Endi bıyl qajetti qarjy bólinse, qurylysy bastalady. Sońǵy jyldary Jańaqalada turǵyn úı qurylysy qarqyn alyp, sonyń nátıjesinde halyq sany 9 myńǵa jetti. Aýdan ortalyǵynyń batys aýmaǵynda jańa aýyl paıda boldy. Sondyqtan aýylda úlgi jobadaǵy eki balabaqsha, beıimdelgen ǵımaratta oryn tepken taǵy ekeýi jáne mektep janynda shaǵyn ortalyq bolǵanymen, munyń bári azdyq etýde.
2017 jyly Jańaqala aýylynda balabaqshaǵa qosa sýmen qamtý jumystary júrgizilip, úsh qabatty kóppáterli turǵyn úı salynbaq. Aldaǵy jyldary mádenıet úıi, ashyq sport alańy, bıznes jáne ákimshilik ǵımarattaryn salyp, ınjenerlik ınfraqurylym jelilerin tartý kózdelýde.
Aıta keteıik, ótken jyly aýdan boıynsha qurylys salasynda aýqymdy jumystar atqaryldy. Onyń ishinde «Nurly jol» baǵdarlamasy aıasynda Ulttyq qor qarajaty esebinen bólingen 117,150 mln. teńgege Jańaqala aýylyndaǵy turǵyn úılerge syrtqy ınjenerlik jeliler (sýmen jabdyqtaý) qurylysy júrgizildi. Nátıjesinde 32,7 shaqyrymdy quraıtyn sý qubyry tartylyp, 384 úıge sý jetkizildi. Sonymen qatar ınjenerlik ınfraqurylymdardy jetkizý boıynsha bıýdjetten qaralǵan 35,941 mln. teńgege Birlik aýylyndaǵy 80 jer teliminiń ınjenerlik ınfraqurylymyn tartý isi júrgizildi. Joba boıynsha 3,8 shaqyrym gaz qubyry, 4,5 shaqyrym elektr jelisi tartyldy. Sondaı-aq Jańaqala aýylynda kúni búgin turǵyn úı qurylysy úshin kezektegi azamattarǵa berilgen 1888 jer teliminiń 1218-i gazben, 978-i elektr jelisimen, 895-i sýmen qamtyldy. Nátıjesinde 52,3 km gaz, 71,6 km sý, 63,5 km elektr jelisi tartylyp otyr. Aldaǵy jyldary qalǵan jer telimderin ınjenerlik jelimen qamtý úshin jobalyq-smetalyq qujattamalary jasaqtalýda.
Sonymen qatar Jańaqala aýylyndaǵy 19 kommýnaldyq turǵyn úılerdiń qurylysy aıaqtaldy. Barlyq ınjenerlik ınfraqurylymy (sý, gaz, elektr, káriz) qosyldy.
Jalpy, turǵyn úılerdi iske qosý kórsetkishi boıynsha Jańaqala aýdany oblysta aldyńǵy qatarda. 2016 jyly jospardaǵy 6500 sharshy metrdiń ornyna 7161 sharshy metr turǵyn úı iske qosyldy.
«Jańaqala aýdanyndaǵy ózekti máseleniń biri - aýyz sý. Halyqty sapaly aýyz sýmen jabdyqtaý boıynsha iri joba qurylysy - «Qulshyq» jer asty sý kózinen Jańaqala toptyq sý qubyryn tartý jumystaryna, sonyń ishinde birinshi kezeńiniń jalpy jobalyq-smetalyq qujattamasyn jasaqtaý men saraptamadan ótkizýge 28,766 mln. teńge kóleminde qarajat bólinip, jobalaýshy uıym - «SPS» JShS-men jumystar júrgizilýde. Jobanyń qurylysy 2017-2018 jyldarǵa josparlanyp otyr. Joba tolyq iske qosylǵanda, jer asty taza sý qorynan aýdan halqynyń 70 paıyzy aýyz sýmen qamtylatyn bolady», dedi «QazAqparat» tilshisine L.Haıretdınov.
