BQO: 1971 jyly salynǵan mektepke 170 mln teńge bólinip, kúrdeli jóndeýden ótti (FOTO)
ORAL. QazAqparat - 9 qańtar kúni Oral qalasyna qarasty Krýgloozernyı kentindegi orta mekteptiń sport zaly paıdalanýǵa berildi. Onyń ashylý rásimine qatysqan Oral qalasynyń ákimi Altaı Kólginovtiń atap ótkenindeı, turǵyndardyń talap-tilegi eskerilip, 2013-2014 jyldary atalǵan mektep kúrdeli jóndeýden ótti.
1971 jyly salynǵan mektep ǵımaraty ábden tozyp turǵan edi, sport zaly da 2011 jyly apatty jaǵdaıda dep tanyldy. Mektepti jóndeýge 170 mln. teńge bólinip, ǵımarattyń ishi-syrty birdeı jańartyldy, shatyry, edeni, esik-terezeleri, jylý jelileri túgel aýystyryldy. Al sport zalyn jańadan salýǵa qala bıýdjetinen 51 mln. teńge qarastyryldy. Merdiger kompanııa «Alataý Aldan Agro» JShS tamyz aıynda qurylysty bastap, qysqa merzimde tolyqtaı aıaqtady. Endi munda aýyl balalarynyń sportpen alańsyz aınalysýyna, dene shynyqtyrý pánin tıisti talaptarǵa saı ótkizýge barlyq múmkindik bar. Atalǵan bilim ordasynda barlyǵy 677 shákirt oqıdy. Elbasy N.Á.Nazarbaevtyń deni saý ult qana básekege qabiletti bolatynyn, sporttyń buqaralyq sıpatyn damytyp, ony halyq densaýlyǵynyń kiltine aınaldyrý kerektigin atap kórsetkeni málim. Aıta keteıik, osy tapsyrmany oryndaý baǵytynda Oral qalasynda aýqymdy jumystar atqarylýda. Máselen, 2014 jyly oblys ortalyǵynda jasandy jabyny bar, kóp beıindi úsh birdeı sport alańy iske qosylyp, mundaı nysandardyń sany qala boıynsha 44-ke jetti. Sport mektepteri men nysandarynyń materıaldyq-tehnıkalyq bazasyn nyǵaıtýǵa, sporttyq qural-jabdyqtar alýǵa byltyr 74 mln. teńge bólindi. Jyl aıaǵynda Derkól shaǵynaýdanynda dene shynyqtyrý-saýyqtyrý kesheni ashyldy. Ótken jyly Zashaǵan kentinde jalpy quny 427 mln. teńge bolatyn taǵy bir dene shynyqtyrý-saýyqtyrý kesheniniń qurylysy bastaldy. Krýgloozernyı orta mektebinde sport zalynyń ashylýy - osy baǵyttaǵy júıeli jumystardyń aıqyn kórinisi.
