BQDA: Sáıkestikti baǵalaý salasyndaǵy akredıtteý baǵalary eki ese tómendetildi

NUR-SULTAN. QazAqparat - Osy jyldyń tamyz aıynyń sońynda Básekelestikti qorǵaý jáne damytý agenttigine sáıkestikti baǵalaý salasyndaǵy akkredıtteý boıynsha qyzmetterge memlekettik monopolııa sýbektisiniń baǵa jobasy kelip tústi, dep habarlaıdy QazAqparat agenttiktiń baspasóz qyzmetine silteme jasap.

Bastapqyda bul qyzmetti júzege asyrý úshin Saýda jáne ıntegratsııa mınıstrligi Tehnıkalyq retteý jáne metrologııa komıtetiniń «Ulttyq akkredıtteý ortalyǵy» ShJQ RMK-da 35 AEK (102 095 teńge) mólsherinde baǵa usyndy.

Memlekettik monopolııa engizilgenge deıin bul qyzmettiń baǵasy 1 adam-kúni 25 AEK-ti qurady.

Agenttik pikirinshe, júrgizilgen saraptama qorytyndysyna sáıkes 17,6 AEK (51 619 teńge) kólemindegi soma negizdelgen baǵa bolyp tabylady, bul bastapqy usynylǵan baǵadan 48,6% - ǵa tómen.

Sonymen qatar, bolashaqta baǵanyń negizsiz ósýine jol bermeý maqsatynda Agenttik baǵalardy aılyq eseptik kórsetkishke baılanystyrmaı, atap aıtqanda 1 adam-kúni úshin 51 619 teńgeni belgileýdi usyndy.

Tehnıkalyq retteý týraly zańnamaǵa sáıkes Ulttyq akkredıtteý ortalyǵy kórsetetin qyzmetterge baǵa belgileý týraly sońǵy sheshimdi ýákiletti organ – Saýda jáne ıntegratsııa mınıstrligi qabyldaıdy.

Atap ótý kerek, memlekettik monopolııa sýbektileriniń baǵalaryna saraptama jasaý monopolııaǵa qarsy organ qyzmeti baǵyttarynyń biri bolyp tabylady jáne monopolııalyq qurylymdardyń taýar naryqtaryna teris áserin nıvelırleý maqsatynda júzege asyrylady.