«Bıznestiń jol kartasy» men «Qarapaıym zattar ekonomıkasy» biriktiriledi
ASTANA. KAZINFORM – «Bıznestiń jol kartasy» men «Qarapaıym zattar ekonomıkasy» baǵdarlamalary biriktiriledi. Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Memleket basshysynyń tapsyrmasy boıynsha básekege qabiletti, ımportty almastyratyn jáne eksportqa baǵdarlanǵan salalardy damytý úshin mınıstrlik „Bıznestiń jol kartasy“ jáne „Qarapaıym zattar ekonomıkasy“ baǵdarlamalaryn biriktirýdi kózdeıtin Memlekettik qoldaý sharalaryn usyný baǵdarlamasynyń jobasyn ázirledi. Jańa jobalardy sýbsıdııalaý úshin bıýdjetti bólý negizinen óńdeý ónerkásibi salasyndaǵy kásiporyndar úshin júzege asyrylady», — dedi mınıstr.
Nurlan Baıbazarovtyń aıtýynsha, shaǵyn jáne orta bıznes jobalaryn sýbsıdııalaý jónindegi jańa tásilder naryqtyq jaǵdaılarǵa kezeń-kezeńimen kóshe otyryp, sýbsıdııanyń saralanǵan ádisin kózdeıdi
«Memlekettik qoldaý sharalarynyń tıimdiligin arttyrý maqsatynda qarsy mindettemeler kúsheıtildi. Sondaı-aq, básekege qabiletti shaǵyn jáne orta kásiporyndardy irikteý úshin kiris bazalyq ólshemsharttar belgilendi. Álemdik tájirıbe kórsetkendeı, kepildik berý quraly eń tıimdi shara bolyp sanalady jáne bıznestiń basty problemasyn — bank aldyndaǵy kepilderdiń jetispeýshiligin sheshedi. Sýbsıdııa quralynan kredıtter boıynsha „Damý“ qorynyń kepildikterin keńeıtýge birtindep kóshý kózdeledi», — dedi ol.
