Bıznestiń máselesin bir jerden sheshetin ortalyqtar bes óńirde ashylady
ASTANA. KAZINFORM — Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen Úkimette ótken keńeste bıznesti qoldaý jáne súıemeldeý ortalyqtaryn qurý tujyrymdamasy tanystyryldy. Pılottyq joba «Damý» qorynyń óńirlik fılıaldarynyń bazasynda júzege asyrylady. Bul týraly Úkimet málim etti.
«Damý» qorynyń basqarma tóraǵasy Farhat Sársekeev atap ótkendeı, búginde kásipkerler memlekettik qoldaýdyń túrli quraldaryna qol jetkize alady. Sonymen birge olar bızneste qıyndyqtar týyndaǵan kezde kóbinese qaıda júginý kerektigin bilmeıdi. Óıtkeni bul máseleni sheshý ártúrli memlekettik organdar men uıymdardyń quzyretine kirýi múmkin.
Máseleni anyqtaýdan bastap, ony retteýge deıingi bıznesti keshendi súıemeldeýdiń biryńǵaı tetigin ázirleý qajettiligi týyndap otyr.
— Qoldaý ortalyqtaryn qurý kezinde «Atameken» UKP problemalyq máseleler tiziliminen 2,4 myńnan astam ShOB ótinishine taldaý jasaldy. Onyń 600-den astamy pılottyq jobany iske qosý josparlanǵan óńirlerden kelip túsken. Bıznes ótinishteriniń negizgi bóligi qarjylandyrýǵa qol jetkizý, bereshekti qaıta qurylymdaý, memlekettik qoldaý sharalaryn alý, salyq, ónimdi ótkizý, kásipkerlik quzyretterdi damytý boıynsha konsýltatsııalar týraly. Sondaı-aq suranystardyń edáýir bóligi AÓK sektoryna qatysty. BQSO dál osy baǵytta jumys isteıdi. Bul rette ortalyqtardyń tıimdiliginiń negizgi kórsetkishi ótkizilgen konsýltatsııanyń sany emes, kásipkerlerdiń rettelgen máseleleriniń úlesi bolady, — dep atap ótti Farhat Sársekeev.
Kúrdeli jaǵdaıǵa tap bolǵan jáne máselesin sheshý úshin qaıda júginý kerektigin bilmeıtin kásipker úshin erekshe yńǵaıly ortalyqtardyń jumysy «bir tereze» qaǵıdaty boıynsha qurylady. Onda «Damý» qorynyń fılıaldary bazasynda barlyq tolǵandyrǵan másele boıynsha keńes alýǵa bolady. Pılottyq joba aıasynda BQSO bes óńirde – Astana, Almaty, Shymkent, Soltústik Qazaqstan jáne Aqtóbe oblystarynda uıymdastyrylady. Qyrkúıekten jeltoqsanǵa deıin sozylatyn pılottyń qorytyndysy boıynsha jańa tetiktiń tıimdiligin baǵalaý júrgizilip, jobany elimizdiń barlyq óńirine taratý týraly sheshim qabyldanady.
Keńeste ortalyqtardy iske qosý jáne jumys isteý tetigin pysyqtaý úshin múddeli memlekettik, quqyq qorǵaý organdary, qarjy retteýshileri men «Damý» qory ókilderi qatysatyn jumys tobyn qurý týraly sheshim qabyldandy.
Aıta keteıik, buǵan deıin jeńil ónerkásipti damytýǵa arnalǵan 28 shara iske asyrylatynyn jazdyq.
