Bıznestiń kadr daıarlaý isine yntasyn arttyrýymyz kerek – Oljas Bektenov
ASTANA. KAZINFORM – Bıznestiń kadr daıarlaý isine yntasyn arttyrýymyz kerek. Bul týraly «Adal azamat. Adal eńbek. Adal bıznes» forýmynda Premer-mınıstr Oljas Bektenov aıtty.
«Memleket basshysy 2025 jyldy jumysshy mamandyqtar jyly dep jarııalady. Jumysshy kadrlar — elimizdiń turaqty áleýmettik jáne ekonomıkalyq damýyna negiz bolatyn basty óndirýshi kúsh, negizgi adamı kapıtal. Kásibı bilim berý men bıznestiń áriptestigi keńeıip keledi. Búgingi tańda 9 myńnan stam kásiporyn dýaldy oqytý júıesine atsalysýda. 518 kompanııa 410 kolledjdi óz qamqorlyǵyna alǵan. Alaıda Qazaqstan ekonomıkasynyń aýqymyna salsaq, bul kórsetkish jetkiliksiz ekeni túsinikti. Biz budan ári de bıznesti kadrlardy daıarlaý jáne qaıta daıarlaýǵa tarta isine yntalandyra túsýimiz kerek. Osyǵan baılanysty kásip ıelerin kadrlyq sapaǵa mán berýge shaqyramyn. Stýdentterge tájirıbeden ótý alańyn usyný jáne JOO bitirgen túlekterdi jumysqa ornalastyrý boıynsha tıimdi júıe qalyptastyrý jolynda sharalardy qolǵa alý kerek. Álemdik tájirıbede qoldanylatyndaı, jumys oryndaryn kvotalaý – bul máselede tıimdi tásil bolýy múmkin», - dedi Úkimet basshysy.
Sondaı-aq Oljas Bektenov salalyq ónerkásiptik bilim berý klasterin qurý arqyly kadrlardy daıarlaýdyń jelilik formasyn damytý kerektigin atap ótti.
«Bizdiń maqsat – bıznes óziniń ıdeıalaryn júzege asyra alatyn, keńeıip, damyp, óz bolashaǵyna ınvestıtsııa quıa alatyn ekonomıka jasaý. Bul turǵyda ár kásipker memlekettik organdardyń ashyqtyǵyna jáne kerek kezde shuǵyl áreket ete alatynyna senimdi bolýy mańyzdy. Jahandyq syn-qaterler men tehnologııalyq progres zamanynda biz bıznesti qoldaý mehanızmderin jetildirip qana qoımaı, el ekonomıkasyn belsendi túrde ártaraptandyrý keregin túsinemiz», - dedi premer-mınıstr.
Forým barysynda Premer-Mınıstr elge janashyrlyq tanytqan kásipkerlerge alǵys aıtty.
Sondaı-aq elimizde otandyq taýarlardyń jáne taýar óndirýshilerdiń biryńǵaı ashyq reestri ázirlenip jatqanyn málimdedi.
Odan bólek, ázirlenip jatqan «Energetıkalyq jáne kommýnaldyq sektordy jańǵyrtý» ulttyq jobasy aıasynda TÚKSh salasyna 10 trıllıon teńge ınvestıtsııa tartylatynyn atap ótti.
Aıta keteıik, keshe elordada «Atameken» Ulttyq kásipkerler palatasynyń XXII sezi ótti. Onda otandyq kásipkerlerdiń qordalanǵan suraqtary talqylanyp, 204 mańyzdy másele Úkimetke joldanatyn boldy.
