Bıznestiń bankten alǵan nesıesiniń 9 paıyzy sýbsıdııalanady

ASTANA. KAZINFORM — Mıkro jáne shaǵyn bıznestiń banktik nesıesiniń shamamen 9 paıyzy sýbsıdııalanady. Bul týraly búgin Úkimet otyrysynda Premer-mınıstr Oljas Bektenov aıtty.

— Memleket basshysynyń tapsyrmasy boıynsha salyqtyq ákimshilendirý «Taza paraqtan» júrgiziledi. Bul sharalar barlyq mıkro jáne shaǵyn bıznes sýbektilerine oń áserin tıgizedi. Normatıvtik-quqyqtyq aktilerdi qabyldaýdy jáne aqparattyq júıelerdiń daıyndyǵyn qamtamasyz ete otyryp, búkil uıymdastyrý sharalaryn jedel túrde júrgizýdi tapsyramyn, — dedi Oljas Bektenov.

Premer-mınıstr «Іsker aımaq» biryńǵaı baǵdarlamasynyń maqsaty negizinen mono, shaǵyn qalalardaǵy jáne aýyldyq jerlerdegi kásipkerlerdi qoldaý ekenin aıtty.

— Shaǵyn bızneske aınalym qarajatyn tolyqtyryp, borysh júktemesin azaıtý múmkindigi beriledi. Biz banktik nesıe boıynsha nomınaldy mólsherlemeniń shamamen 9 paıyzyn sýbsıdııalaıtyn bolamyz. Qoryta aıtqanda, biryńǵaı baǵdarlamanyń jańalyqtary men erejelerin bıznes sýbektilerine qarapaıym tilmen túsindirip, tıisti ádistemelik usynymdardy shyǵarý kerek. Olardy buqaralyq aqparat quraldarynda jáne áleýmettik medıada keńinen taratqan jón, — dedi Úkimet basshysy.

Aıta keteıik, Úkimet «Іsker aımaq» biryńǵaı baǵdarlamasyn bekitti.