Bıznestiń jol kartasy: Óskemendegi emhanaǵa zamanaýı jabdyqtar alyndy
«2010 jyldyń qazan aıynda Óskemende alǵashqy emhanamyz ashyldy. Sol kezde medıtsınalyq mekemede jalpy sany 70 maman jumys istegen-tuǵyn. Eki jyldan keıin «Damý» qory arqyly qarjylaı qoldaý aldyq. Osynyń nátıjesinde, Shyǵys Qazaqstan boıynsha tuńǵysh jekemenshik statsıonar jumysyn bastady. Ǵımaratty jalǵa alyp, jóndeý jumystaryn júrgizdik. Sóıtip, JShS-daǵy shtat sany 130-ǵa deıin ulǵaıtyldy», - dedi Olga Anatolevna.
Memleket tarapynan bólingen qarajat kádege jaratylyp, statsıonarlyq jáne ambýlatorııalyq emdeý jobalary sátti júzege asyrylǵan. Plastıkalyq hırýrgııa, travmatologııa, lor jáne ýrologııa syndy salalar boıynsha qyzmet túrleri keńeıtildi.
«Jyldan jylǵa medıtsınalyq mekemege kelip em-dom qabyldaıtyn naýqastar qatary kóbeıe berdi. Bul halyqtyń atalmysh emhanadaǵy aq halattylarǵa, kórsetiler kómektiń sapasyna bergen oń baǵasynyń belgisi», - deıdi «Evromed» JShS qarjy dırektory.
2019 jyly seriktestikke «Bıznestiń jol kartasy-2025» baǵdarlamasy aıasynda 163 mln teńge mólsherinde qarjy berilgen. Bul somaǵa osyǵan deıin jalǵa alynyp kele jatqan ǵımarat satyp alynypty. Osynyń arqasynda aı saıynǵy shyǵyn barynsha azaıtylǵan.
«Bıyl bizge medıtsınalyq jabdyqtardy jańartýǵa memleket tarapynan 25 mln teńge kóleminde qarjylaı demeý kórsetildi. Álbette, densaýlyq saqtaý salasyndaǵy jekemenshik kompanııalar qoldaý taýyp jatqany quptarlyq is. Ásirese osynaý pandemııa kezinde kásip ıeleri kóp qıyndyqqa tap boldy. Syn saǵatta dárigerlerdiń qoǵamdaǵy róli qanshalyqty mańyzdy ekendigi aıqyn kórindi. Koronavırýs ınfektsııasy órship ketken kezde ózimiz jeke qorǵanys quraldarynyń tapshylyǵyn sezindik. Shetelden ákelinetin dári-dármek baǵasy da qymbattap ketti. Biraq barlyq qıyndyqtardy oıdaǵydaı eńserip kele jatyrmyz. Ujymda qysqartý júrgizilgen emes. Barlyq qyzmetkerlerimizge jalaqy ýaqtyly tólenip otyr», - dedi Olga Anatolevna.
