«Bıznestiń jol kartasy-2025»: SQO-da jas kásipker sán úıin ashty

PETROPAVL. QazAqparat – Soltústik Qazaqstan oblysynda «Jas kásipker» jobasynyń túlegi Zarına Mavlıanı sán úıin ashty. Dızaıner «Bıznestiń jol kartasy-2025» baǵdarlamasy boıynsha 5 mln teńge grant utyp alyp, armanyn oryndady, dep habarlaıdy QazAqparat tilshisi.

SQO kásipkerler palatasy baspasóz qyzmetiniń málimetinshe, Petropavl turǵyny, talantty boıjetken Zarına Mavlıanı úsh jyl buryn «Jas kásipker» jobasyna qatysyp, eki aptalyq kýrstan ótken. Qolónershi grant utyp alyp, oǵan óziniń alǵashqy tigin mashınasyn aldy. Buǵan deıin tapsyrysty tek qolmen oryndap kelgen qyzdyń jumysy jeńildedi.

«Kásipkerlikpen jeti jyl buryn aınalysa bastadym. Bastapqyda býtık ashyp, tigý men toqýǵa arnalǵan túrli fýrnıtýralardy sattym. Keıin ózim qolónermen aınalysa bastadym. Basynda túrli áshekeıler jasadym. Keıin ulttyq naqyshta kıimder – qamzol, sáýkele tige bastadym. Biraq sheberligimdi shyńdaǵym keldi. Osylaısha túrli sheberlik saǵattaryna qatysa bastadym. Al 2019 jyly SQO kásipkerler palatasynyń «Jas kásipker» kýrsynan óttim. Grant alyp, isim órge basty. Ulttyq úlgide toı kóılekterin tigemin», - deıdi Zarına Mavlıanı.

Bıyl kásipker óziniń ekinshi grantyn utyp aldy. Ol «Bıznestiń jol kartasy-2025» baǵdarlamasyna qatysyp, «Damý» kásipkerlikti damytý qory 5 mln teńge berdi. Ol qarajatqa ónerkásiptik tigin mashınalaryn satyp aldy. Sán úıin ashty. Bul jerde daıyn ónim bar, sondaı-aq ulttyq úlgidegi kıimge tapsyrys ta berýge bolady.

«Jas kásipker», «Bastaý Bıznes» baǵdarlamasynyń túlekteri kásip ashyp, alǵan bilimderin is júzinde qoldanyp jatyr. Zarına – sonyń bir mysaly ǵana. Ol bıznesin damytý arqyly jańa jumys oryndaryn da ashady», - deıdi SQO kásipkerler palatasynyń dırektory Arman Orazǵulov.