Bıznestiń jol kartasy – 2025: SQO-da bıyl 170 joba qarjylandyryldy

PETROPAVL. QazAqparat – Soltústik Qazaqstan oblysyndaǵy «ViZaVi Company» JShS 80 túrli kondıterlik ónim shyǵarady. Kásiporyn memlekettik baǵdarlamalardyń turaqty qatysýshysy. Byltyr «Bıznestiń jol kartasy – 2025» baǵdarlamasy aıasynda avtokólik satyp alyp, dıstrıbýtsııany jolǵa qoıdy, dep habarlaıdy QazAqparat tilshisi.

20 sharshy metr bólmede kásibin ashqan Lıaılıa Saıdasheva 16 jyldyń ishinde bastaǵan isin 160 qyzmetkeri bar úlken kásiporynǵa aınaldyra bildi. 1200 sharshy metr aýmaqty alyp jatqan tsehtarda qazir 80 túrli ónim shyǵarylady. Shıkizattyń 80 %-y – otandyq ónim.

«2004 jyly jeke kásipker retinde óz isimdi ashyp, pechene, túrli pırogtar pisirip sata bastadym. Ónim quramynyń tabıǵı komponentterden turýyn jáne sapasyn basty nazarǵa aldym. 5 jyldan keıin JShS bolyp qaıta quryldyq. 2013 jyly «Bıznestiń jol kartasy – 2020» memlekettik baǵdarlamasyna qatysyp, kásiporynǵa qymbat qondyrǵylar aldyq. Aınalymdaǵy qarajatty kóbeıttik», - deıdi Lıaılıa Saıdasheva.

Qazir JShS elimizdiń 9 qalasyna óz ónimin satady. Reseıdiń naryǵyna shyqqan. Onyń bálishteri men pechenelerin Túmen, Ekaterınbýrg, Omby, Qorǵan, Ýfa, Novosibir sııaqty birneshe qalasynan dúken sórelerinen kórýge bolady.

«2020 jyly «Bıznestiń jol kartasy – 2025» baǵdarlamasy aıasynda dıstrıbýtsııa quryp, saýdany damytý maqsatynda avtokólik satyp aldyq. Bul byltyrǵy indet kezinde bizge úlken sep boldy. Óıtkeni ónimge suranys kemip, jańa naryq izdeý qajet boldy. Qazir Nur-Sultan, Pavlodar qalalarynda qurylymdyq bólimshelerimiz jumys isteıdi. Almaty men Óskemende dıstrıbýtsııa damyp keledi», - deıdi kásipker.

SQO-da «Bıznestiń jol kartasy – 2025» baǵdarlamasyna kásipkerler tarapynan suranys úlken. Bıyl shaǵyn jáne orta bıznes ókilderiniń 170 jobasy qarjylaı qoldaýǵa ıe boldy. Nesıeniń jalpy somasy – 4 mlrd 394 mln teńgeden asady.