«Bıznestiń jol kartasy 2025» baǵdarlamasy boıynsha salalyq shekteýler alynyp tastaldy
«Shaǵyn jəne orta kəsipkerlikti damytý memlekettik saıasattyń basymdyqtarynyń biri, ol ekonomıkalyq ósim men jumys oryndarynyń mańyzdy kózi sanalady. Bizdiń baǵalaýymyzsha jalpy ishki ónim qurylymyndaǵy shaǵyn jəne orta bıznestiń úlesi 29,5 paıyzdy quraıdy. Bul sektorda 3 mln-nan astam adam jumys isteıdi. Shaǵyn jəne orta bıznesti negizgi qoldaý «Bıznestiń jol kartasy 2025» jəne «Qarapaıym zattar ekonomıkasy» baǵdarlamalary aıasynda júzege asyrylady. 2019 jyly jəne bıylǵy jyly osy baǵdarlamalar boıynsha qoldaýǵa ıe bolǵan kredıttik portfeldiń jalpy kólemi 372 mlrd teńgeni qurap, 5,5 myńnan astam joba qarjylandyryldy», - dedi vıtse-mınıstr.
Onyń atap ótýinshe, elimizde tótenshe jaǵdaı engizilýi aıasynda Memleket basshysynyń tapsyrmasymen shuǵyl sharalar toptamasy ázirlengen. Bul jumys aýqymynda joǵaryda atalǵan eki baǵdarlama boıynsha túpkilikti zaemshy úshin syıaqy mólsherlemesi sáıkestendirildi.
«Endi atalǵan baǵdarlamalar boıynsha kredıt quny 6 paıyzdan aspaıtyn bolady. Bıznes jobalaryn keńinen qamtý úshin «Bıznestiń jol kartasy 2025« baǵdarlamasy boıynsha salalyq shekteýler alynyp tastaldy. Bul shaǵyn jáne orta kásipkerliktiń kez kelgen sýbektisi baǵdarlamaǵa qatysýshy bola alatyndyǵyn jáne jeńildetilgen qarjylandyrý alatyndyǵyn bildiredi. Bir kásipkerge kredıttik qoldaý mólsheri 7 mlrd teńgege deıin ulǵaıtyldy, aınalym qarajatyn qarjylaı tolyqtyrý aıtarlyqtaı keńeıtildi. Baǵdarlama aıasynda aınalym qarajatyn tolyqtyrý 500 mln teńgege deıin ulǵaıtyldy jáne jańartylyp otyrady. Bul rette saýda qyzmetindegi sýbektiler úshin aınalym qarajatyn tolyqtyrý 100 mln teńgege deıin jetedi. Kepildendirý quraly boıynsha kredıt somasy 1 mlrd teńgege deıin ulǵaıtyldy. Kepil kólemi 50 paıyzdan aspaıtyn bolady. Bul rette 360 mln teńgege deıingi kredıtter zaım somasynyń 85 paıyzyna deıin kepilmen jabylady»,- dedi Jasulan Mədıev.
