«Bıznestiń jol kartasy - 2025» aıasynda shaǵyn bıznesti qoldaýdyń jańa baǵyty iske asyrylady

NUR-SULTAN. QazAqparat – Ulttyq ekonomıka mınıstri Rýslan Dálenov elimizde bıznesti qoldaýdyń jańa baǵyty týraly baıandady, dep habarlaıdy QazAqparat tilshisi.

«Shaǵyn bıznesti qoldaý mańyzdy bolyp otyr. Kredıtter men kepilge qoljetimdilik máselesin sheshý – shaǵyn jáne orta bıznestiń, ásirese, mıkrobıznestiń damý faktory. Sondyqtan «Bıznestiń jol kartasy - 2025» membaǵdarlamasyna «mıkro jáne shaǵyn bıznesti mıkrokredıtteý» jańa baǵyty qosylady», - dedi mınıstr onlaın rejımde halyq aldynda esep berý barysynda.

Jańa baǵyt 6 paıyzdan aspaıtyn mólsherleme boıynsha sýbsıdııalaý arqyly qarjylandyrýdy kózdeıdi. Nesıe kólemi aınalymdaǵy quraldardy tolyqtyrýǵa 5 mln teńgege deıin, óndiristik qajettilikke 20 mln teńgege deıin beriledi. Bul mıkrobıznes ókilderin keń kólemde qamtýǵa múmkindik beredi.

Sonymen qatar, bıznes sýbektileri kepiliniń jetkiliksizdigi jónindegi másele de sheshimin tapty. Damý qory negizgi zaımnyń 85 paıyzyna deıin kepildendiredi.

«Jańa baǵyt «Bıznestiń jol kartasy - 2025» membaǵdarlamasyna ózgerister engizýdi, sondaı-aq, rásimder men ekinshi deńgeıli bankterdi tartýdy talap etedi. Sondyqtan, jańa baǵytty osy aı ishinde iske qosý josparlanyp otyr», - dedi Dálenov.