«Bıznestiń jol kartasy – 2020» baǵdarlamasy bes jylǵa uzartylady – Mamın
«Úkimet pen «Atameken» UKP Elbasy N. Nazarbaev pen Prezıdent Q. Toqaevtyń alǵa qoıǵan ekonomıkanyń sapaly ósimin qamtamasyz etý jáne qazaqstandyqtardyń ál-aýqatyn arttyrý jónindegi strategııalyq mindetterin tıimdi iske asyrý úshin tyǵyz ózara is-qımyl ornatqan», — dedi A. Mamın.
Búginde elimizdiń belsendi turǵyndarynyń 30% astamy shaǵyn jáne orta bıznespen aınalysady. Ekonomıkadaǵy ShOB úlesi 28,5% quraıdy.
«Atameken» UKP-men birlesip, atalǵan kórsetkishti 2025 jyly 35% deıin jetkizý jáne 2025 jylǵa qaraı 50% deıin jetkizý jóninde strategııalyq mindet qoıylǵan. Ol úshin júıeli jáne qurylymdyq sharalar kesheni qabyldanyp jatyr», — dedi Úkimet basshysy.
Óńdeý ónerkásibi, otyn-energetıka, agroónerkásip kesheni, týrızm, kólik jáne logıstıka salalarynyń ınvestıtsııalar tartýǵa úlken áleýeti bar.
«Biz otandyq bıznesti atalǵan protsesterge belsene qatysýǵa shaqyramyz jáne qazaqstandyq ári sheteldik ınvestorlar úshin qolaıly jaǵdaılar jasaýǵa tyrysamyz», — dedi A. Mamın.
Atqarylǵan jumystardyń arqasynda Qazaqstannyń Dúnıejúzilik banktiń Doing Business reıtıngindegi pozıtsııasy 25 orynǵa deıin kóterildi. Bıznes ahýaldy odan ári jaqsartý maqsatynda zańnamalyq bastamalardyń 8-paketi ázirlenýde. Ol bank shottaryn ashý, kásiporyndardy tirkeý, sonyń ishinde QQS tóleýshi retinde tirkeý rásimderin odan ári jeńildetýge, sondaı-aq, mınorıtarlyq aktsıonerlerdi qorǵaýdy kúsheıtýge baǵyttalǵan.
«Kásipkerlerdiń adaldyq prezýmptsııasy» qaǵıdalary zańnamalyq túrde qoıylady. Barlyq olqylyqtar jáne áreket etip turǵan zańnamamen rettelmegen máseleler kásipkerlik sýbektisiniń paıdasyna qaraı túsindiriledi. Bıznes pen azamattarǵa qosymsha mindetter júkteıtin normalarǵa qatysty «ótpeli kezeń» qarastyrylǵan.
Úkimet basshysy «Bıznestiń jol kartasy – 2020» memlekettik baǵdarlamasy iske asyrylǵan jyldary 2,5 trln teńge jalpy nesıe somasyna 14 myńnan asa joba sýbsıdııalanǵanyn atap ótti. Tólengen sýbsıdııalardyń jalpy kólemi 240 mlrd teńgeden asqan.
«Memlekettik baǵdarlamanyń óte tıimdiligin eskere otyryp, ony iske asyrý merzimi 2025 jylǵa deıin uzartylatyn bolady», — dedi A. Mamın.
Elbasynyń 5 áleýmettik bastamasyn iske asyrý aıasynda 24 myńǵa jýyq shaǵyn nesıe berilgen. Nátıjesinde, 22 myńnan asa adam jumyspen qamtyldy. «Bastaý-Bıznes» jobasy boıynsha 3 jyl ishinde bıznes júrgizý negizderine 88 myńnan asa adam oqytyldy. Qysqa merzimdi kásiptik oqytýmen qosymsha 300 myńǵa jýyq adam qamtylatyn bolady.
Premer-Mınıstr jergilikti qamtýdy damytý erekshe baqylaýda ekenin aıtty, ishki naryqty qaýipsiz emes ári sapasyz ónimderden qorǵaý sharalary qabyldanýda, «qarapaıym zattar ekonomıkasy» Jobalyq keńsesiniń fýnktsıonaly arttyryldy, ımport almastyrý úshin 10 basymdyqty taýarlyq toptar anyqtaldy.
«Bul ımporttyń $5 mlrd-qa jýyq qysqarýyn qamtamasyz etýge, ınflıatsııa ımportyn jáne nesıelerdiń paıyzdyq mólsherlemelerin azaıtýǵa múmkindik beredi. Mundaı jobalar úshin memleket barlyq qajetti qoldaý sharalarynyń paketin usynatyn bolady», — dedi A. Mamın.
Kásipkerlikti damytý kóbine-kóp óńirlik sıpatqa ıe. Osyǵan baılanysty Úkimet «Atameken» UKP-men birlesip óńirlerdegi ósý kózderin anyqtaý úshin eldik skrınıng júrgizdi. Búginde júıege respondentter týraly 1,8 mln-ǵa jýyq málimetter júktelgen. Saýalnama elimiz boıynsha 6 myń eldi mekende júrgizilip jatyr. Sonyń nátıjesinde, memlekettik qoldaý sharalary «aýdandyq jáne aýyldyq okrýgter deńgeıinde» ázirlenetin bolady.
Úkimet basshysy mańyzdy mindet retinde qosylǵan quny asa joǵary shıkizattyq emes taýarlardyń eksportyn arttyrý mindetin atady. Osy maqsattarda aldaǵy 3 jylǵa 500 mlrd teńge qarjy bólingen. Eksportty ártaraptandyrý úshin 7 taýarlyq top anyqtalǵan.
«Úkimet Qazaqstanda bıznes júrgizý úshin eń qolaıly jaǵdaılardyń jasalýy úshin barlyq múmkindikterdi jasaıdy. Biz bıznes-ortany odan ári jetildirý boıynsha jumystardy jalǵastyramyz», — dedi ol.
