Bıznestiń sáıkestendirý nómiri - bıznes úshin jasalǵan zor jeńildik - Ádilet mınıstrligi
aýsymnyń 22-si. QazAqparat /Aıdar Ospanalıev/ - Bıznestiń sáıkestendirý nómiri arqyly azamattar tıisti organdarǵa artyq qujattar tapsyrý mashaqatynan qutylady.
Zańdy tulǵalar bankten esep ashyp, nemese nesıe alatyn bolsa, álde qandaı da bir baıqaýlarǵa qatysatyn bolsa, olarǵa mindetti túrde qujattarynyń kóshirmelerin ótkizýleri qajet bolatyn. Ol degenińiz bir býma qaǵaz. Al bıznestiń sáıkestendirilgen nómiri arqyly kásipkerge tek memlekettik tirkeý jónindegi kýáligin ótkizý ǵana qajet bolady. Búgin www.bnews.kz portaly arqyly ótken on-laın konferentsııada Ádilet mınıstrliginiń Tirkeý komıteti tóraǵasynyń orynbasary Venera Kalımova osylaı dedi, dep habarlaıdy QazAqparat.
Onyń sózine qaraǵanda, memlekettik tirkeý týraly qujatta bıznestiń sáıkestendirý nómiri bolady. «Bul bıznes úshin jasalǵan zor jeńildik bolyp esepteledi. Alaıda, menińshe, ol zańdy tulǵalardyń tizimin júrgizetin memlekettik organdar úshin de qolaıly. Onyń ústine, buryn ár memlekettik organda óziniń sáıkestendirý málimetter bazasy bolatyn. Búgin jalǵyz bıznesti sáıkestendirý nómiri ǵana kóptegen máselelerdi sheshedi», dedi komıtet tóraǵasynyń orynbasary.
