Bıznestiń salyǵy tómendeıdi
ASTANA. QazAqparat - QR Eńbek jáne xalyqty áleýmettik qorǵaý vıtse-mınıstri Svetlana Jaqypovanyń aıtýynsha, mindetti áleýmettik medıtsınalyq saqtandyrý aıasynda jumys berýshileriniń salyǵyn azaıtý josparlanyp otyr, dep xabarlaıdy QazAqparat tilshisi.
"Qazirgi kezde arnaıy zań jobasy daıyn. Oǵan sáıkes, jumys berýshilerdiń áleýmettik salyǵy 1,5 paıyzǵa tómendeıdi. Mysaly, osy ýaqytqa deıin 11 paıyz tólense, aldaǵy ýaqytta atalǵan kórsetkish 9,5 paıyz bolady. Sonda jańaǵy 1,5 paıyzdyń esebinen medıtsınalyq saqtandyrý jarnalaryn óteýge bolady", - dep atap kórsetti Jaqypova búgin Astanada ótken respýblıkalyq semınarda.
Aıta keteıik, aǵymdaǵy jyly shildeden bastap jumys berýshiler men jeke kásipkerler mindetti áleýmettik medıtsınalyq saqtandyrý qoryna jarna tóleı bastady. Jumys berýshiler ázirshe jumysshy jalaqysynyń 1 paıyzyn tóleıdi. Alaıda atalǵan jarna 3669 teńgeden aspaýy tıis. Jeke kásipkerler bolsa, eki mınımaldy jalaqynyń 5 paıyzyn aýdarýy shart. Ol somma 2446 teńgeden artyq bolmaýy qajet.
