Bıznestiń órkendeýine jaǵdaı jasaý úshin 66 zań aktisine ózgertý engiziledi

ASTANA. QazAqparat – Bızneske qoıylatyn basy artyq talaptardy joıý úshin 66 zań aktisine ózgertý engiziledi. Bul jaıynda Ulttyq ekonomıka mınıstri Álibek Qýantyrov Úkimet otyrysynda aıtty, dep habarlaıdy QazAqparat tilshisi.

«Zańdar boıynsha aıtsaq, ózgeristerdi talap etetin shamamen 66 zań aktisi anyqtaldy. Jumysty durys uıymdastyrý úshin ótken jyly úırenshikti ári tekserilgen tásil usynyldy. Atalǵan tásil boıynsha retteýdiń árbir salasyndaǵy jumys toptary túzetýler ázirlep, Ulttyq ekonomıka mınıstrligine jınaqtaýǵa joldaıdy. Qazirgi tańda mınıstrlik biryńǵaı pýldy qalyptastyrý úshin 15 sala boıynsha túzetýler jınaqtap aldy, 17 sala boıynsha túzetýler áli kútilip otyr», - dedi ol.

Mınıstrdiń aıtýyna qaraǵanda, túzetýlerdiń biryńǵaı pýly ázirlenip, maquldanǵanan keıin Bıznesti júrgizý máseleleri jónindegi zań jobasyna engiziledi.

«Osyǵan baılanysty memlekettik organdarǵa jumys tobynyń múshelerimen kodeksterge/zańdarǵa óz túzetýlerin jedel pysyqtaýdy tapsyrýdy jáne olardyı jınaqtaý úshin bir aptanyń ishinde Ulttyq ekonomıka mınıstrligine usynýdy, sondaı-aq quzyreti boıynsha zańǵa táýeldi aktilerge túzetýler engizýdi qamtamasyz etýdi suraımyn», - dedi Ulttyq ekonomıka mınıstri.