Bıznestiń qarsy mindettemesin baqylaý júıesine 1700 kásipker tirkeldi - Myrzahmetov

NUR-SULTAN. QazAqparat – «Atameken» ulttyq kásipkerler palatasynyń basqarma tóraǵasy Abylaı Myrzahmetov bıznestiń qarsy mindettemesin baqylaý jónindegi Prezıdenttiń tapsyrmasy qalaı oryndalyp jatqanyn aıtyp berdi, dep habarlaıdy QazAqparat tilshisi.

«Memleket tarapynan kóptegen baǵdarlama arqyly kásipkerlerge qoldaý kórsetiledi. Osy baǵdarlamalarda kásipkerlerdiń qarsy mindettemelerin tsıfrlyq júıe arqyly baqylaý tapsyrylǵan bolatyn. Indýstrııa jáne ınfraqurylymdyq damý mınıstrligi men «Atameken» ulttyq kásipkerler palatasy mundaı memlekettik aqparattyq júıeni daıyndady. Ol júıe ótken jyldyń jeltoqsanynda Memleket basshysyna tanystyryldy. Qazir erikti túrde 1700 kompanııa osy júıege tirkelgen. ıAǵnı bul baǵdarlamanyń ishinde barlyq kompanııanyń mindettemesin kórýge bolady», - dedi Abylaı Myrzahmetov Úkimet otyrysynda.

Onyń aıtýynsha, osy júıe arqyly 1700 kásipkerdiń qandaı baǵdarlama boıynsha memleket tarapynan kómek aldy, salyǵy qansha, eksportqa shyǵý áleýeti – bárin baqylap otyrýǵa bolady.

«Endigi kezekte – muny zańdy túrde barlyǵyna mindetteý. Memleket basshysy kúzde osy máseleni aıaǵyna jetkizýdi tapsyrdy. Eger 15 myń kásipkerdiń bári osy júıege tirkelse, olardyń qarsy mindettemelerin kórip otyrýǵa bolady», - dedi ol.

Eske sala ketsek, Úkimettiń keńeıtilgen otyrysynda Prezıdent Qasym-Jomart Toqaev bıznestiń qarsy mindettemesin baqylaý kerektigi jóninde tapsyrma bergen edi.

«Biz bıznestiń qarsy mindettemesin baqylaýymyz kerek. Birinshi kezekte, jumys oryndary men aılyqtyń saqtalýyna nazar aýdarylýy tıis. Úkimet pen «Atameken» bıznes mindettemesiniń tsıfrlyq turǵyda baqylanýy boıynsha jumysty 2 aıdyń ishinde aıaqtaýy kerek», - dedi Qasym-Jomart Toqaev.