Bıznestiń iskerlik belsendiligi birtindep qalpyna kelýde – Ulttyq bank

ALMATY. QazAqparat – Qazaqstan Ulttyq banki 447 kásiporyn arasynda saýalnama júrgizdi, nátıjıesinde ekonomıka boıynsha iskerlik belsendilik ındeks kórsetkishi edáýir ósken, dep habarlaıdy QazAqparat tilshisi.

«2020 jyldyń mamyr aıynda ekonomıkadaǵy iskerlik belsendilik ındeksi 50-den tómen bolyp qaldy, biraq iskerlik belsendiliktiń birshama qalpyna kelýi baıqaldy, ındeks 44,0 kórsetti (2020 jylǵy sáýirde - 37,2). Kórsetkishtiń baıaýlaýy ekonomıkanyń barlyq sektorlarynda oryn aldy, aıtarlyqtaı - qyzmet kórsetý salasynda oryn aldy. Mamyr aıynda qyzmet kórsetý salasyndaǵy iskerlik belsendilik ındeksi 42,8, qurylysta - 42,1, ónerkásipte - 46,9 qurady (2020 jylǵy sáýirde - sáıkesinshe 34,7, 36,3 jáne 42,1)»,– dep habarlady Ulttyq bank.

Desekte, basqa salalarmen salystyrǵanda, qyzmet kórsetý salasynda 2020 jyldyń mamyr aıynda iskerlik belsendilik ındeksiniń edáýir jaqsarǵany baıqaldy (ósim 8,1 p.t.), bul ındekstiń barlyq komponentteriniń kúsheıýine baılanysty boldy.

Qurylys salasynda jańa tapsyrystar sanynyń jáne jumyspen qamtý deńgeıiniń ósýi aldyńǵy aımen salystyrǵanda iskerlik belsendiliktiń quldyraýynyń baıaýlaýyna ákeldi. Ónerkásip salasynda da ındekstiń barlyq komponentteriniń jaqsarýy ındıkatordyń shamaly ósýine ákeldi.

Qazaqstan ekonomıkasynda Bıznes-ahýal ındeksi (BAI) 2020 jylǵy mamyr aıynda (-) 13,7 qurady, sáýirde bul kórsetkish (-) 31,6 boldy. Bıznesti júrizý jaǵdaıy azdap jaqsardy jáne Qazaqstannyń naqty sektoryndaǵy kásiporyndar úshin qıyndyǵy tómendedi, biraq soǵan qaramastan, teris dınamıkasy jalǵasýda.

2020 jylǵy mamyr aıynda barlyq salalardaǵy kásiporyndardyń oń baǵalaý sanynyń artýyna baılanysty saýalnamaǵa qatysqan kásiporyndardyń aǵymdaǵy jaǵdaıyn baǵalaýy jaqsardy, ol (-) 26,3 qurady. Naqty sektordaǵy kásiporyndardyń iskerlik kútimi 2020 jyldyń maýsym aıynda (-) 0,13, sáýirde - (-) 19,6 qurady.