Bıznestiń ǵylymı-zertteý jumystaryna ketken shyǵyny sýbsıdııalanady

NUR-SULTAN. QazAqparat - 2020 jyldan bastap bıznestiń aýyl sharýashylyǵyndaǵy ǵylymı-zertteý jumystaryna ketken shyǵyny sýbsıdııalanady. Bul týraly búgin Úkimet otyrysynda QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Ósimdik sharýashylyǵynda túsimniń artýyna kóptegen faktor jınalyp ta, jeke-jeke de áser etedi. Osyǵan súıene otyryp tuqym, tyńaıtqysh jáne ósimdikterdi qorǵaý quraldary qunynyń bir bóligin arzandatýǵa baǵyttalǵan bazalyq sýbsıdııalardy qaldyramyz», - dedi ol.

Mınıstrdiń aıtýynsha, sharýashylyq tyńaıtqysh qoldanyp, sapaly tuqym satyp alsa, ýaqtyly hımııalyq óńdeý júrgizse, ónim túsimi kem degende gektaryna 7-8 tsentnerden joǵary bolmaq. Al bul rette ǵylym men bıznestiń kúsh-jigerin biriktirý, ǵylymı ázirlemelerdi kommertsııalandyrý, ǵylymnyń bızneske baǵdarlanýy mańyzdy.

«Ne sebý kerek, qandaı tehnologııamen jáne qandaı merzimderde egý qajet ekenine tek ǵylym ǵana jaýap berip, bıznestiń kómekshisine aınalýy tıis. Keler jyldan bastap bıznestiń ǵylymı-zertteý jáne tájirıbelik-konstrýktorlyq jumystar júrgizýge jumsaǵan shyǵyndary sýbsıdııalanatynyn aıta ketken jón», - dedi ol.