Bıznestiń ǵylymı-zertteý jumystary sýbsıdııalanady - mınıstr
«Biz tıimsiz sýbsıdııalardan bas tartyp, nátıjege baǵdarlanǵan sýbsıdııalarǵa kóshý arqyly qoldanystaǵy memlekettik qoldaý sharalaryn jetildirýdi usynamyz. Munda, aıta keterligi, barlyq ózgerister budan buryn qabyldanǵan Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasyna sáıkes júzege asyrylatyn bolady. Atap aıtqanda, bul qujatta áýel basta-aq ósimdik sharýashylyǵynda 2019 jyldan bastap, mal sharýashylyǵynda 2020 jyldan bastap taýarlyq-spetsıfıkalyq sýbsıdııalardan arylý kózdelgen bolatyn. Kórsetilip otyrǵan memlekettik qoldaýdyń arqasynda salanyń ınvestıtsııalyq tartymdylyǵy ósýde, bul bizge negizgi kapıtalǵa ınvestıtsııa tartý jónindegi nysanaly ındıkatorlardy oryndaýǵa múmkindik beredi», - dedi vedomstvo basshysy.
Onyń sózine qaraǵanda, búgingi kúni jalpy somasy 4,4 trln teńgege 113 ınvestıtsııalyq joba pysyqtaý jáne iske asyrý satysynda tur.
Osy oraıda tıisti memlekettik qoldaý ólshemsharttary belgilenetin bolady.
«Birinshiden, ósimdik sharýashylyǵynda túsimdiliktiń artýyna kóptegen faktorlar barshasy jınalyp ta, jeke-jeke de áser etedi. Osyǵan súıene otyryp, biz tuqym, tyńaıtqysh pen ósimdikterdi qorǵaý quraldary qunynyń bir bóligin arzandatýǵa baǵyttalǵan bazalyq sýbsıdııalardy qaldyramyz. Mysaly, eger sharýashylyq tyńaıtqysh qoldansa, sapaly tuqym satyp alsa, ýaqtyly hımııalyq óńdeý júrgizse - túsimdilik eń kem degende gektaryna 7-8 tsentnerge joǵary bolady. Bul jerde ǵylym men bıznestiń kúsh-jigerin biriktirý, ǵylymı ázirlemelerdi kommertsııalandyrý, ǵylymnyń bızneske baǵdarlanýy mańyzdy. Óıtkeni ne sebý kerek, qandaı tehnologııamen jáne qandaı merzimderde egý qajet ekenine tek ǵylym ǵana jaýap berip, bıznestiń kómekshisine aınalýy tıis», - dedi S. Omarov.
Keler jyldan bastap bıznestiń ǵylymı-zertteý jáne tájirıbelik-konstrýktorlyq jumystar júrgizýge jumsaǵan shyǵyndary sýbsıdııalanatynyn aıta ketken jón.
Budan buryn habarlanǵandaı, mınıstr Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasyna ózgerister daıyndalǵanyn aıtty.