Bıznestiń áleýmettik jaýapkershiligine arnalǵan «Paryz» baıqaýyna ótinimder qabyldanýda
ASTANA. QazAqparat - Bıznestiń áleýmettik jaýapkershiligine arnalǵan «Paryz» respýblıkalyq baıqaýyna ótinimderdi qabyldaý bastaldy.
Bul týraly búgin QR Eńbek jáne halyqty áleýmettik qorǵaý vıtse-mınıstri Birjan Nurymbetov málim etti, dep habarlaıdy QazAqparat.
«Biz ózimizdiń áleýmettik seriktesterimiz QR Kásipodaqtar federatsııasymen, «Atameken» Ulttyq kásipkerler palatasymen jáne Energetıka mınıstrligimen birlesip, aǵymdaǵy jyly «Paryz» bıznestiń áleýmettik jaýapkershiligi baıqaýyn mereıtoılyq onynshy ret ótkizbekpiz. Sondyqtan sharanyń aıryqsha datasyn eskere otyryp, ony «Paryz - tabystyń 10 jyly» degen taqyryppen uıymdastyramyz»,- dedi vıtse-mınıstr.
Onyń atap ótýinshe, «Paryz» bıznestiń áleýmettik jaýapkershiligi jónindegi baıqaý iri, orta jáne shaǵyn kásipkerlik sýbektileri arasynda ótkiziledi. Baıqaýdyń «Úzdik áleýmettik jaýapty kásiporyn», «Eńbek qorǵaý salasyndaǵy úzdik kásiporyn», «Úzdik ujymdyq shart» jáne «Ekologııaǵa qosqan úlesi úshin» atalymdary boıynsha jeńimpazdary anyqtalatyn bolady.
«2008 jyldan bastap baıqaý ótkizilgen aralyqta oǵan elimizdiń barlyq óńirilerinen 4245 kásiporyn, jumys berýshi qatysty. Bul onyń damý qarqyny oń ekendigin, bıznestiń kózqarasy durys ekendigin kórsetedi», - dedi Birjan Nurymbetov.
