Bıznestiń áleýmettik jaýapkershiligi sheńberinde soǵys ardagerlerin áleýmettik qoldaýǵa 10 mlrd. teńgeden astam qarajat qarastyrylady - Eńbek mınıstri
Búgin QR Parlamenti Májilisi men RF Federaldyq Jınalysy Memlekettik Dýmasy arasyndaǵy yntymaqtastyq týraly Palataaralyq parlamenttik komıssııanyń otyrysy barysynda QR Eńbek jáne halyqty áleýmettik qorǵaý mınıstri Gúlshara Ábdihalyqova osylaı málim etti, dep habarlaıdy QazAqparat.
«Uly jeńistiń 65 jyldyǵyn merekeleýge oraı, jergilikti atqarýshy organdar tarapynan úlken sharalar da júzege asady dep kútilýde. Máselen, oblys ákimdikteriniń, Astana jáne Almaty qalalarynyń jedel málimetterine qaraǵanda, bıýdjettik múmkindikterdi esepke ala otyryp, bıznestiń áleýmettik jaýapkershiligi sheńberinde 10 mlrd. teńgeden astam qarajat soǵys ardagerlerin qoldaýǵa jumsalady. Bunyń ishinde 205 ardagerge 1,5 mlrd. teńge shamasynda birretki materıaldyq kómek beriledi, turǵyn úı kezeginde turǵan 750 soǵys ardagerlerin baspanamen qamtamasyz etýge 2,2 mlrd. teńge kózdeledi. Budan basqa, jergilikti jerlerdegi qala ishindegi, halyqaralyq tasymaldaǵy kólikpen tegin júrýleri úshin 26 myńnan astam ardagerge 343,6 mln. teńge, al 4 myń 895 ardagerdiń tisterin protezdeý úshin 64,4 mln. teńge qarastyrylady», dedi G. Ábdihalyqova.
Sonymen birge, bıznestiń áleýmettik jaýapkershiligi sheńberinde ardagerler úshin shıpajaılarda emdelý, olardy jeńildetilgen dári-dármekpen qamtamasyz etý, kommýnaldyq qyzmetterin tóleý, baspanalaryn kúrdeli jóndeýden ótkizip, otynmen qamtamasyz etý sekildi sharalar da uıymdastyrylatyn bolady.
