Bıznesti júrgizý jeńildigi boıynsha óńirler men qalalar reıtıngi jasalady
ASTANA. QazAqparat - Bıznesti júrgizý jeńildigi boıynsha óńirler men qalalar reıtıngi anyqtalady. Bul týraly búgin Úkimette ótken baspasóz máslıhatynda Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
«Qazirgi ýaqytta Memleket basshysynyń tapsyrmasy óńirlerde bıznesti júrgizý jeńildigi boıynsha óńirler men qalalar reıtıngin júrgizý arqyly oryndalyp jatyr. Búgingi tańda bıznes-ortany el ishi jáne elaralyq deńgeılerde zertteýge baǵyttalǵan álemdik balamaly tájirıbeni eskere otyryp, tıisti ádisteme jasalǵan. Óńirler men qalalarda bıznesti júrgizý jaǵdaıy 5 faktor aıasynda, ıaǵnı retteýshilik klımat, bızneske qarjynyń qoljetimdigi, adamı kapıtal, bıznes ınfraqurylymy, qabyldanatyn sheshimderdiń ashyqtyǵy boıynsha baǵalanady»,-dedi Tımýr Súleımenov.
Onyń sózine qaraǵanda, reıtıngti daıyndaý barysynda barlyǵy 8 120-dan kem emes respondent suralady. Sonymen qatar baǵalaý eki deńgeıde qamtylmaq. Bul rette óńirlik baǵytta 14 oblys pen Astana jáne Almaty qalalary, al qalalyq baǵalaýda 55 shahardy salystyrý arqyly júrgiziledi.
«Demek, reıtıngti daıyndaý barysynda kásipkerlikti damytýdaǵy problemalyq aspektileri anyqtalyp, sondaı-aq bıznes pikiri boıynsha, aımaqtar men qalalarda isker ortanyń jaǵdaıyn jaqsartýǵa múmkindik beretin usynystar kórsetiletin bolady»,-dedi mınıstr.
