Bıznesti tekserýshilerdiń sany qanshaǵa azaıdy
Kásipkerlikti damytý departamentiniń dırektory Aslanbek Jaqypovtyń aıtýynsha, osydan on jyl buryn elimizde 800 000 myń kásipker bolǵan. Sol kezde tekseristerdiń sany 400 000-ǵa deıin baratyn. Ótken jyly otandyq bıznesmenderdiń sany 1,2 mıllıonnan asty. Al tekseristerdiń sany 81 000-ǵa deıin azaıdy. Osylaısha, on jyldyń ishinde kásipkerler kóbeıse de, tekserister 4,5 esege qysqaryp otyr.
«Budan bólek, bızneske qatysty talaptar da kúrt tómendedi. Máselen, sanıtarlyq-epıdemıologııalyq normalar boıynsha 11 500 talap bolsa, búginde negizgi degen 1800 talap qaldy. Buryn órt qaýipsizdigi salasynda 3 myń talap boldy. Qazir osy sanattaǵy talaptardyń sany 870-ke deıin azaıdy. Al óndiristik qaýipsizdik talaptary 10 000-nan 7300-ge deıin qysqardy. Osynyń nátıjesinde tekserýshilerdiń sany da azaıyp otyr. Atap aıtqanda, shtattyń 1000 tekserýshi qyzmeti ońtaılandyrýǵa usynylǵan bolatyn. Osy ýaqytqa deıin 600-i ońtaılandyryldy», - dedi A.Jaqypov Astanada ótken baspasóz máslıxatynda.
Aıta keteıik, búgin QR Ulttyq ekonomıka mınıstrligi kásipkerlerdi tekserýdiń jańa ádisin túsindirdi. Budan bólek, aldaǵy ýaqytta kásipkerlerdiń quqyqtaryn buzǵan memlekettik organdardy jazalaý sharalary bastaıdy. Ol úshin arnaıy qoǵamdyq qabyldaýlar ashylady. Oǵan kez kelgen bıznesmen óz aryzyn tapsyra alady.
