Bıznesti tekserýlerdiń negizinen jazalaýǵa baǵyttalatyny baıqalady – Atameken
«Bıyl kásipkerlik qyzmetti 2020 jylǵa deıingi memlekettik retteý tujyrymdamasynyń aıaqtalatyny málim. Kásipkerlik qyzmetti memlekettik tıimdi retteýge baǵyttalǵan keıingi jyldardaǵy barlyq reforma osy tujyrymdamaǵa sáıkes júrgizildi. Degenmen eldegi bıznesti memlekettik retteýdi damytýǵa baǵyttalǵan júıeli jumystarǵa qaramastan kelesi máseleler anyqtalyp otyr. Atap aıtqanda, memlekettik organdardyń retteýshilik áserin taldaýdy júrgizýge beıtarap kózqarastyń saqtalýy, keıbir retteýshi organdardyń bıznesti baqylaý júktemesin shamadan tys arttyrýy, tekserýlerdiń negizinen jazalaýǵa baǵyttalatyny baıqalady», - dedi Eldar Jumaǵazıev Úkimet otyrysynda.
Onyń aıtýynsha zańnamalyq retteýge qaramastan aqparattyq talaptardyń, ártúrli esep berýlerdiń, bıznes sýbektileriniń kópshiligine keń taralýy, zańnamadaǵy normalarǵa qaramastan ózin-ózi retteý salalarynyń nashar damýy da sezilgen.
«Osyǵan baılanysty aldaǵy bes jylǵa kásipkerlik damytýdyń jańa tujyrymdamasy usynylady. Jańa tujyrymdama tek retteý máselelerimen shektelip qalmaı, kásipkerlikti damytý men qoldaý tetikterin qamtý kerek dep esepteımiz. Jańa tujyrymdamany ázirleýge daıyn ekenimizdi aıtqym keledi», - dedi ol.
Eske sala ketsek, búgingi Úkimet otyrysynda Ulttyq ekonomıka mınıstri Rýslan Dálenov Qazaqstanda bıznes-klımatty jaqsartý reformalarynyń 8-toptamasy qabyldanatynyn jetkizgen edi. Óz kezeginde Úkimet basshysy Asqar Mamın Ulttyq ekonomıka mınıstrligine 1 shildege deıin «Bızneske arnalǵan Úkimet» jobasyn iske qosýdy tapsyrǵan bolatyn.