Bıznesti reıderlik basyp alýǵa kimder qatysady
NUR-SULTAN. QazAqparat - QR Parlamenti Májilisiniń depýtaty Merýert Qazbekova bıznesti qorǵaý boıynsha QR Premer-Mınıstriniń birinshi orynbasary - Qarjy mınıstri Álıhan Smaıylovtyń atyna depýtattyq saýal joldady, dep habarlaıdy QazAqparat tilshisi.
«Qazirgi kezde túrli sebeptermen bıznesin tartyp alýǵa baılanysty aram pıǵyldy sheneýnikterdiń zańsyz is-qımyldaryna kásipkerler shaǵymdanýda. Ótken jyldary reıderlik áreketterge iri jáne tabysy joǵary kásiporyndar tap bolsa, qazirgi kezde shaǵyn jáne orta bıznes kásiporyndaryna da qyzyǵýshylyq paıda bolýda», - dedi depýtat Májilistiń jalpy otyrysynda.
Onyń sózine qaraǵanda, «qara reıderlik» jaǵdaılar kóbeıip keledi, ıaǵnı zańnamany buza otyryp, kásiporyn jumysyna aram pıǵyldy sheneýnikterdiń aralasýy oryn alýda. Osy oraıda bıznesti tartyp alýdyń túrli tásilderi qoldanylady.
Depýtat 2009 jyly Elbasy Nursultan Nazarbaev reıderlikke qarsy zańdy ázirleýdi tapsyrǵanyn atap ótti.
«Bul turǵyda «Aq jol» partııasynyń fraktsııasy Elbasynyń atalǵan tapsyramasyn eskerip, bıznesti reıderlik basyp alýǵa qarsy is-qımyl boıynsha zańdy daıarlaýǵa tıisti qadam jasaý qajet dep sanaıdy», - dedi M. Qazbekova.
