Bıznesti qoldaýdyń biryńǵaı aqparattyq portalyn qurý kerek - senator
NUR-SULTAN. QazAqparat – Depýtat Dáýren Ádilbekov Senat otyrysynda Úkimet basshysy Álıhan Smaıylovtyń atyna depýtattyq saýal joldap, onda shaǵyn jáne orta bıznesti memlekettik qoldaý tetikteriniń tıimdiligin arttyrý sharalaryn atady, dep habarlaıdy QazAqparat tilshisi.
Senator túrli ákimshiler kásipkerlerge memlekettik qoldaý kórsetetinin atap ótti. Sonyń nátıjesinde bıznesmender ártúrli operatorlardyń alýan túrli kóptegen kózderinen memleket olarǵa qandaı qoldaý baǵdarlamalaryn usynatyny týraly aqparat alýǵa májbúr. Bul, depýtattyń pikirinshe, bıznes úshin aqparattyń qoljetimdiligin tómendetedi, sondyqtan kásipkerler tarapynan narazylyq týdyrady.
«ShOB ókilderi memlekettik qoldaý sharalary men ony kórsetýdiń sharttary týraly ártúrli baǵdarlama operatorlarynan aqparat alady. Osylaısha, bıznesti memlekettik qoldaýdyń kópqurylymdy tetikteri kásipkerler tarapynan narazylyq týdyryp otyr. Kásipkerlik sýbektilerine memlekettik qoldaý is-sharalarynyń tıimdiligin arttyrý maqsatynda Úkimetke memlekettik qoldaý sharalary operatorlarynyń sanyn qysqartý jáne biriktirý arqyly ońtaılandyrý múmkindigin qarastyrýdy usynamyz», - dedi Dáýren Ádilbekov.
Senator osyǵan baılanysty ShOB-ty memlekettik qoldaýdyń biryńǵaı aqparattyq portalyn qurý qajet dep sanaıdy, onda kásipkerlerge qajetti barlyq aqparat jınaqtalatyn bolady.
D. Ádilbekov saýalynda sonymen birge memlekettik qoldaýdyń keıbir baǵdarlamalary bir-birin qaıtalaıtynyn atap ótti. Depýtattyń usynysy – Úkimet taldaý júrgizip, bıznesti qoldaýdyń tıimdi sharalaryn anyqtaýy kerek.
«Qazirgi ýaqytta ár mınıstrlik: UEM, AShM, IIDM, EHÁQM jáne basqalar ShOB-ti memlekettik qoldaý sharalaryn ár jaqtan basqaryp otyr. Barlyq salalarda kórsetiletin memlekettik qoldaýdyń barlyq is-sharasy boıynsha birde-bir memlekettik organ tolyq aqparat bere almady, árbir memlekettik organ tek óz salasynda ǵana aqparatqa ıe. Memlekettik qoldaý is-sharalaryn usynýdyń qarapaıym, túsinikti tetikteri bar biryńǵaı qaǵıdalary qajet», - dedi senator.
