Bıznesti damytý úshin memleket tarapynan qandaı qoldaý qajet – depýtat jaýaby
«Árıne, kez kelgen damyǵan el sııaqty, ekonomıkanyń damýyna negiz bolatyn - shaǵyn jáne orta bıznes. Bul baǵytta Memleket basshysy qysqa jáne uzaq merzimde oryndalýy tıis tıis mindetterdi júktedi. Prezıdent kásipkerlikti damytý úshin memleketten barynsha qoldaý kórsetiletinin aıtty. Tıisinshe, bıznes óz tarapynan áleýmettik jaýapkershilik tanytýy qajet. Ol - jańa jumys oryndaryn qurý, jalaqy, salyq tólemderi, joǵary sapaly jáne básekege qabiletti taýarlar óndirý isi. Ol úshin ne qajet? Eń mańyzdysy – retteý tetikterin basynan bastap qolǵa alý qajet. Memleket basshysy júzdegen ereje men tártipti alyp tastap, bıznes aldyndaǵy jańa mindetterdi aıqyndaý tapsyrdy. Osy oraıda, Salyq kodeksine kóptegen ózgeris enedi dep kútilýde», - dedi depýtat.
Suhbat barysynda Qaınar Abasov bızneske memleketten qandaı qoldaý sharalary qajet ekenin de toqtaldy. Onyń aıtýynsha, elge tartylǵan ınvestıtsııalar turaqty jumys istep turǵan ári boljam boıynsha shyǵyny óteletin jerlerge baǵyttalady. Sondyqtan bıznes memleketten kezeń-kezeńimen júıeli iske asatyn, damýǵa múmkindik beretin sheshimderdi talap etedi. Depýtat paıymynsha, buǵan qol jetkizý jolynda ashyq salyq júıesi, ádil memlekettik satyp alýlar jáne memleketpen ózara qarym-qatynas rettelýi tıis.
«Qazirgi Salyq kodeksine qabyldanǵan sátten bastap kóptegen ózgerister engizildi. Bul damýdy aıtarlyqtaı tejep otyr. Eger túsinikti salyqtyq-fıskaldyq saıasat bolsa, ınvestıtsııa tartylatyn bolady. ıAǵnı, Prezıdent aıtqandaı, bul saralanǵan, bıznesti yntalandyratyn kodeks bolmaq. Eń bastysy - Salyq kodeksi bıýrokratııadan aýlaq bolýy kerek. Qarapaıym tilmen aıtqanda, barlyq erejeler eshqandaı qıyndyqsyz iske asýy mańyzdy. Búgingi tańda salyqtyq ákimshilendirý - bıznes úshin úlken máseli», - dep túıindedi Qaınar Abasov.
