Bıznestegi áıelderdiń úlesi AQSh pen Túrkııaǵa qaraǵanda joǵary – Úkimet basshysy
«Kóptegen elde áıelder qaýymy genderlik kedergilerge tap bolady. Ótken jyly dúnıejúzilik ekonomıkalyq forým genderlik alshaqtyqty joıý úshin óte uzaq ýaqyt kerek ekenin málimdedi. ıAǵnı 132 jyl qajet ekendigin anyqtady. Qazaqstan óz kezeginde, 2021-jylmen salystyrǵanda 15 tarmaqqa kóterilip, jahandyq genderlik alshaqtyq ındeksinde óz pozıtsııasyn jaqsartty. Elimizde áıelder memlekettik basqarý isine teń dárejede qatysady. Sonymen qatar belsendi qoǵamdyq qyzmet júrgizip, bıznes-jobalardy iske asyryp jatyr», - dedi Álıhan Smaıylov Úkimet otyrysynda.
Premer-Mınıstr keltirgen málimetke sáıkes, elimizde bıznestegi áıelderdiń úlesi 45% quraıdy.
«Bul - AQSh pen Túrkııa sııaqty elderge qaraǵanda joǵary kórsetkish. Qazaqstandyq áıelder «Damý» qory qoldaǵan jobalardyń jartysyna jýyǵyn júzege asyryp otyr. Bul rette jobalardyń úshten birin aýyldyq kásipker áıelder aldy. Biz túrli salalardaǵy áıelderdiń belsendiligin arttyrýǵa múddeli ekendigimizdi atap ótkim keledi», - deıdi ol.