Bızneste de jaýapkershilik bolýy kerek - Abylaı Myrzahmetov
ALMATY. QazAqparat - Almaty Invest forum-da «Atameken» Ulttyq kásipkerler palatasy men Almaty ákimdigi arasynda bolǵan dıalog týraly aıtyldy, dep habarlaıdy QazAqparat tilshisi.
«Atameken» Ulttyq kásipkerler palatasynyń tóraǵasy Abylaı Myrzahmetov Almaty ákimdigimen ózara túsinistik pen yntymaqtastyqqa qurylǵan seriktestik ornatylǵanyn atap ótti.
«Úsh jyl boıy Almatyda saýda oryndaryna, lıftilerge, avtoturaq pen bazarlarǵa qatysty kóp ózgerister oryn aldy. Biz ylǵı ákimdikpen baılanystamyz. Aı saıyn ákimdikpen kezdesip, bar máseleni ashyq talqylaı alatynymyz jáne ony sheshý joldaryn birge qarastyratynymyz qýantady. Ulttyq kásipkerler palatasy dırektorynyń orynbasary deńgeıinde arnaıy komıssııa quryldy. Jol kartasy bar. Biz onda avtoturaq pen bazarlardy jabý sekildi barlyq máseleni ashyq talqylaımyz. Úsh jyl buryn kásipkerlikke kedergi jasamaý kerek dedik. Al ákimdik bolsa turǵyndarǵy yńǵaıly qala jasaýǵa basymdyq berýdi usyndy. Qazir ákimdik azamattar úshin de, kásipkerlik úshin de dıalogtyń bolǵany durys ekenin túsindi. Eń bastysy, qalanyń ınfraqurylymyn josparlaý júzege aspaq. Panfılov kóshesiniń boıynda qalaı bolsa, solaı salynǵan kishigirim saýda oryndary kóp. Olardy alyp tastasa, kásipkerler narazylyq tanytýy múmkin. Bıznestiń tutynýshylar aldynda da jaýapkershiligi bolýy kerek. Bárimiz jaıly qalada ómir súrýge tıispiz», - dedi Abylaı Myrzahmetov.
Ulttyq kásipkerler palatasynyń basshysy Qazaqstanda bıznes úshin kóp jaǵdaı jasalǵanyn jáne bıznestiń óskenin aıtyp ótti. Onyń pikirinshe, bul kórinis Almatyda aıryqsha kózge túsedi.
«Bıznestiń aldyna jaýapkershilik qoıý kerek. Memleket tarapynan qadaǵalaý kóp nárseni túzetti. Sonymen qatar saqtandyrýshylar baqylap, ózderi rettep otyra alatyn reıtıng júıesin jasamaqpyz. Bul - kún tártibindegi másele. Ákimdik barlyq nárseni retteı almaıdy. Olar yńǵaıly orta jasap beredi. Al keden, qarjy saıasaty men zań Úkimettiń quzyryna kiredi. Bizdiń mindetimiz - 2020 jyly bıznesmender túsetin salyqty jergilikti bılikke qaldyrý. Bul ákimderge bıznes úshin yńǵaıly orta jasaýǵa múmkindik beredi. Almaty kóshbasshylyǵyn tanytady», - dedi Abylaı Myrzahmetov.
Aıta ketý kerek, búgin Almatyda bıznes ortany damytýǵa baǵyttalǵan Investıtsııalyq forým ótip jatyr.
