Bıznesti jeńildikpen qarjylandyrýǵa 275 mlrd teńge bólinedi

ASTANA. KAZINFORM – Bıyl bıznesti jeńildikpen qarjylandyrýǵa 275 mlrd teńge bólinedi. Bul týraly Ulttyq ekonomıka mınıstrligi Kásipkerlikti memlekettik qoldaý jáne qorǵaý departamentiniń dırektory Daryn Ábdýáli aıtty.

- Búgingi tańda bıznesti memlekettik qoldaýdyń talap etiletin sharalarynyń biri Kásipkerlikti qoldaýdyń keshendi baǵdarlamasy aıasynda iske asyrylatyn Bıznestiń jol kartasy jáne Qarapaıym zattar ekonomıkasy baǵdarlamalarynyń quraldary bolyp qala beredi. Bul baǵdarlamanyń operatory – «Damý» qory. Máselen, 2024 jyldyń qorytyndysy boıynsha kredıtterdi sýbsıdııalaý arqyly jeńildetilgen qarjylandyrý sharalarymen shamamen 1 trln teńge kredıt somasyna 17 myńnan astam bıznes jobasy qamtyldy. 310 mlrd teńge somasyna 8 myń joba boıynsha kepildik berildi. Bıyl osy maqsattarǵa 275,2 mlrd teńge baǵyttaý josparlanǵan, - dedi departament basshysy Ortalyq kommýnıkatsııalar qyzmetindegi brıfıngte.

Onyń dereginshe, óńirler bólinisinde jobalardyń basym bóligi Almaty, Astana, Shymkent qalalarynda, Almaty, Túrkistan jáne Aqtóbe oblystarynda iske asyryldy.

- Salalar boıynsha óńdeý ónerkásibi, kólik jáne qoımalaý, bilim berý jobalary basym, - dedi Darhan Ábdýáli.

Aıta keteıik, qazirgi ýaqytta ShOB sýbektilerin jeńildikpen qarjylandyrýdyń jańa baǵdarlamasy ázirlenip jatyr.