Bıznesti memlekettik qoldaý aýdıti: 14 materıal quqyq qorǵaý organdaryna joldanady

ASTANA. KAZINFORM — 133 mlrd teńge bıýdjet qarajatynyń tıimsiz josparlanýy anyqtaldy. Bul týraly kásipkerlik sýbektilerin memlekettik qoldaýdyń tıimdiligine júrgiziletin aýdıt boıynsha esepti jarııalaý kezinde Joǵary aýdıtorlyq palatanyń tóraǵasy Álıhan Smaıylov aıtty. 

— Joǵary aýdıtorlyq palatanyń baǵalaýynsha, qarjylyq qoldaý sharalaryn alǵan jobalardyń 64 paıyzynda tólengen salyqtyń ósimi qamtamasyz etilgen. Biraq olardyń barlyǵy memlekettik qoldaý esebinen dep aıtýǵa bolmaıdy. Málimdelgen óndiris iske qosylmaı, jabdyq áli de qaptamada bolsa da, tólengen salyq kólemi artqan jobalar bar. Buny kásipkerdiń qoldaý sharalaryn alǵanǵa deıin retke qoıǵan qyzmetimen túsindirýge bolady… Jalpy, memlekettik qoldaýdyń 1 teńgesine tólengen salyqtyń kólemi negizinen 1 teńgeden kem keledi, — dedi Álıhan Smaıylov Májilistiń jalpy otyrysynda.

Onyń aıtýynsha, 133 mlrd teńge bıýdjet qarajatynyń tıimsiz josparlanýy jáne paıdalanýy, 132 mlrd teńgege qarjylyq eseptiń burmalanǵany, 13 mlrd teńgege qarjylandyrý talaptaryn buzý anyqtaldy. 40 mlrd teńgege jýyq ekonomıkalyq shyǵyn men jiberip alǵan paıda tirkeldi.

— 14 materıal quqyq qorǵaý organdaryna jiberiledi. Ákimshilik jaýapkershilikke tartý úshin 105 materıal joldandy. Árbir anyqtalǵan kemshilik boıynsha naqty tapsyrmalar men usynymdar berildi, olardyń oryndalýy Joǵary aýdıtorlyq palatanyń baqylaýynda bolady, — dedi JAP basshysy.

Buǵan deıin habarlanǵandaı, Joǵary aýdıtorlyq palata bıznesti qoldaý tetikteriniń kemshiligin atady.