Bıznesti qorǵaý: 1 myńnan astam negizsiz sheshimniń kúshi joıyldy
ASTANA. KAZINFORM — Bas prokýratýrada «Qazaqstandyq sheteldik ınvestorlar keńesi» qaýymdastyǵymen (QShIKQ) kezdesý ótti, dep habarlaıdy Investorlardyń quqyqtaryn qorǵaý komıteti.
Іs-sharaǵa Bas Prokýrordyń birinshi orynbasary Jandos Ómirálıev, Investorlardyń quqyqtaryn qorǵaý komıtetiniń tóraǵasy Baýyrjan Eraly, «Qazaqstandyq sheteldik ınvestorlar keńesi» qaýymdastyǵynyń Basqarma tóraǵasy Erlan Dosymbekov jáne dırektory Janna Baıdasheva qatysty.
Kezdesý barysynda taraptar atqarylyp jatqan jumystar men qyzmettiń negizgi baǵyttary týraly ózekti aqparatpen almasty.
Bas Prokýrordyń birinshi orynbasary Jandos Ómirálıev Memleket basshysynyń Jarlyǵymen Investıtsııalyq ombýdsmen fýnktsııalary Bas Prokýrorǵa berilgenin jáne Investorlardyń quqyqtaryn qorǵaý komıteti qurylǵanyn atap ótti.
Búgingi tańda prokýrorlar jalpy somasy 96 trln teńgeni quraıtyn 2,8 myńnan astam jobaǵa jeke súıemeldeý júrgizip jatyr.
Sondaı-aq «prokýrorlyq súzgi» jumysy týraly aıtyldy. Memlekettik organdardyń barlyq tekserýleri, talap-aryzdary men ákimshilik sharalary prokýrormen kelisilýi úshin osy súzgi arqyly ótedi. Ol aldyn alý sıpatynda jumys isteıdi: ınvestorǵa habarlamaı-aq, bastama kóterý satysynda negizsiz sharalarǵa tosqaýyl qoıady.
— Súzgi jumys istegen kezeńde memlekettik organdardyń 28 myńnan astam sheshimi zerdelenip, nátıjesinde bıznestiń jumysyn toqtatýy múmkin 1 myńnan astam negizsiz bastama keri qaıtaryldy. Atap aıtqanda, 450-ge jýyq ákimshilik is júrgizýdiń joly kesilip, 470 zańsyz tekserý toqtatyldy. Osy faktiler boıynsha zań buzýshylyqtarǵa jol bergen 340 tulǵa túrli jaýapkershilikke tartyldy, — delingen habarlamada.
Kezdesý barysynda ınvestıtsııalyq jobalardy iske asyrýǵa kedergi keltiretin ózekti máseleler boıynsha shuǵyl derekter almasý maqsatynda ózara is-qımyldy jolǵa qoıý týraly ýaǵdalastyqqa qol jetkizildi.
QShIKQ kezdesýdi uıymdastyrǵany úshin alǵys bildirip, eldiń quqyqtyq júıesine degen senimdi nyǵaıtýǵa yqpal etetin kópjaqty dıalog alańy bolýǵa daıyn ekenin rastady. Taraptardyń kelisimi boıynsha prokýrorlardyń Sheteldik ınvestorlar keńesiniń jumys toptaryna qatysý máselesi pysyqtalmaq.
Sonymen qatar, taraptar komıtettiń Qazaqstan Respýblıkasyndaǵy negizgi quqyqtyq kepil retindegi mártebesin bekite otyryp, ınvestorlardy qorǵaý salasyndaǵy yntymaqtastyqty odan ary damytý men nyǵaıtýǵa nıetti ekendikterin rastady.
Budan buryn depýtat elimizdegi ınvestorlarǵa qolaıly qalany atady.
