Bıznesti qoldaýdyń jańa baǵdarlamasy ázirlendi

ASTANA. KAZINFORM – «Bıznestiń jol kartasy» jáne «Qarapaıym zattar ekonomıkasy» baǵdarlamalary biriktiriledi. Bul týraly QR Ulttyq ekonomıka mınıstri Álibek Qýantyrov aıtyp berdi.

«Bizdiń mınıstrlik «Bıznestiń jol kartasy» jáne «Qarapaıym zattar ekonomıkasy» baǵdarlamalaryn biriktirýdi kózdeıtin memlekettik qoldaý sharalaryn usyný jónindegi baǵdarlamany ázirledi. Baǵdarlamada básekege qabiletti, ımportty almastyratyn jáne eksportqa baǵdarlanǵan salalardy damytýǵa jáne jańa jumys oryndaryn qurýǵa basa nazar aýdaryldy», - dedi Álibek Qýantyrov Úkimet otyrysyndaǵy baıandamasynda. 

Mınıstrdiń aıtýynsha, jańa baǵdarlama 6 baǵyttan turady: «Mıkrokásipkerlik», «Shaǵyn jáne orta kásipkerlik», «Óńdeý ónerkásibi men kórsetiletin qyzmetterdegi shaǵyn, orta jáne iri kásipkerlik», «Mono jáne shaǵyn qalalardaǵy, aýyldyq eldi mekenderdegi kásipkerlik», «Áleýmettik kásipkerlik», «Qor bırjasy».

«Osy baǵyttar sheńberinde jańa jobalardy sýbsıdııalaý úshin bıýdjet bólý negizinen óńdeý ónerkásibi salasyndaǵy kásiporyndar úshin júzege asyrylady. Baǵdarlama sýbsıdııalaýdan kepildik berý quraldaryna jáne qarjylyq emes qoldaýdyń ózge sharalaryna birtindep kóshýdi kózdeıdi», - dedi spıker.

Shaǵyn jáne orta kásipkerlik jobalaryn sýbsıdııalaý jónindegi jańa tásilder naryqtyq jaǵdaılarǵa kezeń-kezeńimen kóshý arqyly sýbsıdııalaýdyń saralanǵan ádisin kózdeıdi. Máselen, alǵashqy 3 jylda sýbsıdııalaýdy eskere otyryp, túpkilikti qaryz alýshy 8%, tórtinshi jyly – 9%, besinshi jyly – 10% mólsherleme boıynsha qarjylandyrylady.

«Bul tásil bıýdjetke túsetin júktemeni azaıtýǵa jáne bıznestiń naryqtyq qarjylandyrý tetikterine birtindep kóshýin júzege asyrýǵa múmkindik beredi», - dep túsindirdi Á. Qýantyrov. 

Aıta keteıik, Qazaqstanda shaǵyn jáne orta bıznestiń ekonomıkaǵa qatysýy 36,5%-ǵa deıin ósken.