Bıznesti qoldaý tetikterin qaıta retteý qajet - Máýlen Áshimbaev
ASTANA. KAZINFORM – Senat tóraǵasy Máýlen Áshimbaev otandyq bıznesti qoldaý tetikterin qaıta retteý qajet ekenin aıtty. Ol óziniń damýyn toqtatqan, tek memlekettik qoldaýdyń arqasynda ǵana kún kórip otyrǵan kompanııalardy naryqtyq ekonomıkany ilgeriletýge kedergi keltirip otyrǵan basty sebepterdiń biri retinde atady. Bul jóninde Palata spıkeri búgin Senattyń jalpy otyrysynda málimdedi.
Atap aıtqanda, otyrys barysynda «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» Zańy birinshi oqylymda qaraldy. M.Áshimbaev atap ótkendeı, Qazaqstanda bıznesti damytý úshin Dúnıejúzilik banktiń jýyrdaǵy baıandamasynda jarııalanǵan birneshe júıeli máselege nazar aýdarǵan jón.
«Jaqynda Dúnıejúzilik banktiń «Qazaqstan ekonomıkasy týraly» atty zertteýi jarııalandy. Sol jerdegi bizdiń ekonomıkamyz, onyń ishinde bıznestiń jaǵdaıy tereń taldanǵan bólimder bárimizdiń qyzyǵýshylyǵymyzdy týdyrady dep oılaımyn. Naqty aıtqanda, 2012 jyldan 2022 jylǵa deıingi on jyl ishinde bizde ónimdiliktiń ósýi is júzinde bolmaǵany jazylǵan. Zertteýde tıisti derekter de keltirilgen. Menińshe, Úkimet ol málimetterdi zerdeleýi kerek», – dedi Senat tóraǵasy.
Mundaı jaǵymsyz saldar damymaıtyn, tabys ákelmeıtin jáne naryqta jańa oıynshylardyń alǵa jyljýyna kedergi keltirip, memlekettik qoldaý esebinen ǵana kún kóretin kompanııalardyń ósýine alyp keledi. Sondyqtan Máýlen Áshimbaev ósýge, ónimdilikti arttyrýǵa, ınnovatsııalyq tehnologııalardy engizýge umtylatyn kompanııalarǵa ǵana memlekettik qoldaý kórsetý qajet ekenin aıtty.
«Ikemsiz memlekettik qoldaý, onyń ishinde «Damý» arqyly qoldaý jáne aýyl sharýashylyǵyna beriletin sýbsıdııalar elimizde zombı-kompanııalardyń kóptep paıda bolýyna alyp keldi. Olar memlekettiń arqasynda ǵana «aman» júr. Al, ózderi esh damymaıdy, alǵa jyljymaıdy. Qalypty naryqtyq ekonomıkada kompanııalardyń startap, qalyptasý, jetilý, keıbir tehnologııalardy engizý sııaqty ómirlik tsıkli bar. Soǵan baılanysty olar múmkindik bolsa, ári qaraı damıdy, bolmasa, jabylady. ıAǵnı, bizde bul tsıkl buzyldy. Bizde naryqqa jańa kompanııalar kóp kire bermeıdi. Al, damymaıtyn «eski» kompanııalar naryqtan ketpeıdi. Biz bul týraly birneshe ret aıttyq. Bıznesti qoldaý tıimdi, ıkemdi, nátıjeli bolýy kerek. Sondyqtan bıznesti qoldaý tetikterin qaıta retteýdiń mańyzy zor. Bul rette, bankrotqa ushyraý da ekonomıkany tazartý, jańa kompanııalardyń paıda bolýy turǵysynan bir mehanızm ekenin eskergen jón. Odan qoryqpaý kerek. Bul qalypty naryqtyq ekonomıkanyń bir elementi», – dedi Máýlen Áshimbaev.
