Bıznesti qoldaý sharalarynyń tıimdiligin arttyrý úshin ákimshilik shyǵyndardy azaıtý kerek - Bektenov
ASTANA. KAZINFORM - Premer-mınıstr Oljas Bektenov eksportqa baǵyttalǵan bıznes óndiristerdi memlekettik qoldaý sharalary boıynsha keńes ótkizdi. Oǵan jekelegen mınıstrler men aımaq ákimderi, «Báıterek» UBH, «Qazaqstan damý banki» AQ, «Atameken» UKP basshylyqtary, sondaı-aq birqatar saladaǵy bıznes ókilderi qatysty.
Bul týraly Úkimettiń baspasóz qyzmeti habarlady.
Negizgi maqsat – Memleket basshysynyń ekonomıkany ártaraptandyrý jáne ósimniń jańa múmkindikterin damytý jónindegi tapsyrmalaryn júzege asyrý.
«Báıterek» holdınginiń ekonomıkanyń túrli salalarynda pılottyq jobalardy iske asyrýdaǵy jańa tásilderi qarastyryldy. Bul ınvestıtsııalyq jobalardy qaraý talaptaryn jeńildetý jáne birizdendirý, sondaı-aq ótinim bergennen bastap, jobalyq qýatqa shyqqanǵa deıin bıznes-bastamalarǵa qoldaý kórsetýge baǵyttalǵan.
Birinshi kezeńde tamaq ónimderin óndirý, tereńdete óńdelgen metallýrgııa ónimderi jáne basqa da jobalar qarastyryldy.
«Báıterek» holdıngi engizgen biryńǵaı jáne jeńildetilgen ótinimderdi qaraý reglamenti bızneske kórsetiletin memlekettik qoldaýdyń ashyqtyǵyn ári tıimdiligin arttyrady, sondaı-aq ishki naryqta otandyq ónimniń ósý qarqynyn arttyryp, eksporttyq múmkindikterdi keńeıtedi.
Premer-mınıstr bızneske kórsetiletin qoldaý sharalarynyń tıimdiligin arttyrý úshin ákimshilik shyǵyndardy azaıtý qajettigin atap ótti.
«Memlekettik organdar men damý ınstıtýttary bıznespen barynsha qolaıly jaǵdaı rejıminde jumys istep, elimizge qajet eksportqa baǵyttalǵan óndiristerdi damytýǵa daıyn tıimdi kásipkerlerdi belsendi izdeýi kerek», — dep atap ótti Oljas Bektenov.
Úkimet basshysy iri kásiporyndardyń shaǵyn jáne orta bıznespen tyǵyz jumys isteýiniń mańyzyn erekshe atap ótti. Otandyq óndirýshilerdiń taýarlary, qyzmetteri men jumystaryn satyp alý boıynsha óz ýaqytynda offteık-kelisimder jasaý qajettigi aıtyldy. Osylaısha, qoldaý sharalary tek belgili bir kásipkerlerge ǵana emes, jalpy qazaqstandyq óndiristi damytýǵa oń áser etýi tıis.
Ulttyq ekonomıka mınıstrligine múddeli memlekettik organdar men aımaq ákimdikteri, «Báıterek» holdıngi men «Atameken» Ulttyq palatasymen birlese jańa proaktıvti jumys formatyna kóshýdi jedel túrde qamtamasyz etý tapsyryldy.
Osyǵan deıin Úkimettiń 9 aıda Ulttyq qordan 4 trln teńge alǵany týraly jadzy.
