Bıznesinen bas tartýǵa ýáde bergen chehııalyq mıllıarder premer-mınıstr boldy

ASTANA. KAZINFORM — Mıllıarder Andreı Babısh Cheh Respýblıkasynyń jańa premer-mınıstri bolyp taǵaıyndaldy, al onyń tolyq quramdaǵy kabıneti aldaǵy kúnderi qyzmetke kirisedi dep kútilip otyr, dep habarlaıdy VVS.

Onyń taǵaıyndalýy prezıdent Petr Pavel qoıǵan mańyzdy talaptan keıin júzege asty. ıAǵnı Babısh óziniń azyq-túlik óńdeý, aýyl sharýashylyǵy jáne hımııa salalaryn qamtıtyn iri konglomeraty Agrofert kompanııasyna baqylaýdy toqtatatyny jóninde jarııa túrde ýáde berýi tıis bolǵan.

«Men el ishinde de, shetelde de barlyq azamattarymyzdyń múddesin qorǵaıtyn premer-mınıstr bolýǵa ýáde beremin», dedi Babısh Pragadaǵy saraıda ótken rásimnen keıin.

Ol sondaı-aq:

«Cheh Respýblıkasyn búkil planetada ómir súrýge eń jaqsy jer etý úshin jumys isteıtin premer-mınıstr bolamyn», dep aıtty.

Bul maqsattardyń oryndalýy qolsozym jerde turmaǵany anyq, biraq 71 jastaǵy Babısh keń aýqymda oılaýǵa úırengenin aıtty.

2021 jylǵa deıin tórt jyl boıy premer-mınıstr bolǵan Babısh sońǵy jyldary bılikke qaraı qaıta oıysqan jáne onyń kabınetine ýltraońshyl SPD partııasynyń jáne EO-ǵa kúmánmen qaraıtyn «Ózderi úshin avtomobıl júrgizýshileri» partııasynyń músheleri kiredi.

Eske sala ketsek, 7 qarasha kúni Chehııa Prezıdenti úkimettiń otstavkasyn qabyldady.