Bıznesin keńeıtken kásipkerlerge qandaı qoldaý kórsetilýi múmkin
ASTANA. KAZINFORM — Qazaqstanda shaǵyn kásipkerlikten orta bıznes sanatyna ótken kompanııalarǵa arnalǵan arnaıy qoldaý sharalaryn engizý usynyldy. Bul kásiporyndarǵa qyzmet aıasyn keńeıtken kezde memlekettik kómekten aıyrylyp qalmaýǵa múmkindik beredi.
Mundaı usynysty «Atameken» Ulttyq kásipkerler palatasy basqarma tóraǵasynyń orynbasary Aslan Qalıǵazın aıtty. Ol Quryltaıdyń Ekonomıkalyq saıasat, ónerkásip jáne energetıka komıtetiniń keńeıtilgen otyrysynda shaǵyn jáne orta bıznesti damytý máselelerine toqtaldy. Jıynda Prezıdent Qasym-Jomart Toqaevtyń 2026 jylǵy 28 qazandaǵy Joldaýynda berilgen tapsyrmalardyń oryndalý barysy talqylanyp jatyr.
Aslan Qalıǵazınniń aıtýynsha, kásipkerlikti damytýdyń kelesi mańyzdy kezeńi — shaǵyn kásiporyndardyń orta bıznes deńgeıine kóterilýine jaǵdaı jasaý. Óıtkeni orta kásiporyndar jańa jabdyqtar satyp alýǵa qarjy quıyp, bilikti mamandarǵa jumys oryndaryn asha alady. Sondaı-aq olar shaǵyn jetkizýshiler men iri óndiris oryndarynyń arasyndaǵy baılanysty nyǵaıtady.
— Muny ınvestıtsııa kóleminen de kórýge bolady. Sońǵy bes jylda orta kásiporyndardyń negizgi kapıtalǵa salǵan ınvestıtsııasy nomınaldy mánde 2,6 ese ósti. 2021 jyly bul kórsetkish 1,13 trıllıon teńge bolsa, 2025 jyly 2,95 trıllıon teńgege jetti. Osy kezeńde orta bıznestiń eldegi jalpy ınvestıtsııadaǵy úlesi 8,5 paıyzdan 12,6 paıyzǵa deıin artty. Demek, sany az bolǵanyna qaramastan, orta kásiporyndar óndiristi damytýǵa kóbirek qarjy bólip otyr, — dedi Aslan Qalıǵazın.
Degenmen shaǵyn kásiporyndardyń orta bızneske ótýine birqatar kedergi bar. Olardyń qatarynda salyq talaptary, ınvestıtsııalyq qarjynyń tapshylyǵy jáne memlekettik qoldaýdyń keıbir túrlerinen aıyrylý qaýpi tur.
Máselen, kásiporynnyń tabysy artqanymen, óndiris kólemi burynǵy deńgeıinde qalýy múmkin. Sebebi túsimniń kóbeıýine shıkizat pen daıyn ónim baǵasynyń qymbattaýy da áser etedi. Soǵan qaramastan, mundaı kásiporyn orta bıznes sanatyna ótip, mıkro jáne shaǵyn bızneske arnalǵan memlekettik jeńildikterden aıyrylyp qalýy yqtımal.
Osy máseleni sheshý úshin «Atameken» kásiporyndarǵa bir sanattan ekinshisine ótý kezeńinde arnaıy qoldaý kórsetýdi usynyp otyr.
— Shaǵyn bıznesten orta bızneske ótýge arnalǵan qoldaý sharalarynyń arnaıy toptamasyn ázirleýdi usynamyz. Onyń aıasynda salyqtyq ákimshilendirý talaptaryna beıimdelýge jaǵdaı jasaý, buryn maquldanǵan memlekettik kómekti kelisilgen merzimge deıin saqtaý, ınvestıtsııalyq nesıe berý jáne óndiristi jańǵyrtýǵa qoldaý kórsetý kózdelýi kerek, — dedi ol.
Sonymen qatar Ulttyq kásipkerler palatasy shaǵyn jetkizýshiler men iri tapsyrys berýshilerdiń arasyndaǵy zańdy saýda qatynastaryna kedergi keltiretin salyq talaptaryn qaıta qaraý qajet dep esepteıdi.
— Biz salyq esepteýdiń jeńildetilgen tártibin engizýdi usynamyz. ıAǵnı kásiporynnyń barlyq tabysynan shyǵyndaryn alyp tastap, qalǵan somaǵa ǵana salyq salý qajet. Bul kásipkerlerdi kúrdeli salyq esebin júrgizýden bosatady. Sonymen qatar ártúrli salyq rejımimen jumys isteıtin kásiporyndardyń bir-birimen saýda jasaýyna kedergi keltiretin shekteýlerdi alyp tastaýdy usynamyz. Ońaılatylǵan deklaratsııa boıynsha jumys isteıtin kásiporyndardyń basqa kásiporyndarmen jasaıtyn mámilelerine 8 paıyzdyq salyq mólsherlemesin belgilep, shekti kórsetkishti 300 myń aılyq eseptik kórsetkishke deıin tómendetý qajet. Memleket kásiporyndardyń ósýine jaǵdaı jasaýy kerek, olardy shaǵyn bıznes deńgeıinde qalýǵa májbúrlemeýi tıis, — dedi Aslan Qalıǵazın.
Aıta keteıik, buǵan deıin Memleket basshysy shaǵyn bıznesti úsh jyl teksermeıtinin aıtqan edi.
