Bıznesmenderdiń órt qaýipsizdigine salǵyrttyǵy qynjyltady -TJK tóraǵasy
ASTANA. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker bıznesmenderdiń Qazaqstandaǵy oıyn-saýyq jáne iri saýda ortalyqtarynyń tekserisine qaramastan, óz nysandarynyń órt qaýipsizdigine salǵyrt qaraıtynyn málim etti, dep habarlaıdy «QazAqparat» HAA tilshisi.
«Ókinishke qaraı, qaıǵyly jaǵdaı oryn alǵaly beri qanshama ýaqyt ótse de (RF Kemerevodaǵy oqıǵa - avt.) biz tekseris jumysyn bastap ketkenimizben, menshik ıeleri eshqandaı áreketke baratyn emes. Olarǵa tekseris keletinin bilip otyrǵandyqtan, aldyn ala daıyndalýy kerek emes pe edi!? Evakýatsııalyq shyǵý joldary men órt avtomatıkasy talaptarynyń buzylýynyń bárin shuǵyl túrde joıý kerek edi. Biz ortalyq televıdenıe arqyly Reseıdiń tergeý komıtetteri sóz sóılep, kináli adamdardyń qamalǵanyn kúnde kórip otyrmyz. Biraq, ókinishke qaraı bizdiń bıznesmenderdiń bul máselelerge kelgende reaktsııasy aıtarlyqtaı oń deı almas edim. Bul álbette, bizdi qynjyltady», - dedi Bekker Astanada ótken baspasóz máslıhatynda.
Eske sala ketsek, Vladımır Bekker buǵan deıin Qazaqstanda bir aptanyń ishinde tekserilgen 75 nysannyń úsheýi ǵana talapqa saı ekenin jetkizgen bolatyn.
««Elimizdegi oıyn-saýyq ortalyqtary men iri saýda dúkenderin bir aptadaǵy tekserisi boıynsha aldyn ala aqparatty usynamyz. Premer-Mınıstrdiń tapsyrmasy negizinde barlyq iri oıyn-saýyq ortalyqtaryn aýqymdy túrde tekserý jumystary bastalyp ketken bolatyn. Ótken aptanyń dúısenbisinde 207 tekseris jumysy bastalsa, qazirgi deıin (6 sáýirdegi jaǵdaı boıynsha) 308 tekserý júrgizildi. ıAǵnı, bir aptanyń ishinde 75 nysandy tekserý jumysy aıaqtaldy. Tekserilgen nysandarda 1 myńnan astam buzýshylyq (1037) anyqtaldy. Buzýshylyqtar tek 3 nysanda anyqtalǵan joq», - dedi Bekker.
