Bıznesmender óz taýarlaryn shyǵarýdy birneshe jylǵa josparlaı alady -Sultanov
ASTANA. QazAqparat - Qarjy mınıstri Baqyt Sultanovtyń aıtýynsha, memlekettik jáne kvazımemlekettik sektordyń satyp alýlaryn biryńǵaı júıege qosýdyń arqasynda otandyq kásipkerler taýar shyǵarý kólemin aldyn ala josparlaı alady, dep habarlaıdy QazAqparat tilshisi.
«Jalpy, myna memlekettik satyp alýlardy alsaq, sosyn kvazımemlekettik sektor men ken-óndirý salasyndaǵy kompanııalarynyń satyp alatyn taýarlary men qyzmetterin qossaq, ol degen 13 trıllıon teńgeni quraıdy. Endi, berilgen tapsyrma boıysha biz bızneske birneshe jylǵa qandaı taýarlardyń satyp alynatynyn, memleket bolsyn, kvazımemlekettik sektor bar, taý-ken óndirýshi kompanııalar bolsyn, birneshe jyldyń ishinde kimde qandaı suranys bolady, baǵalar qalaı bolady, kim qatysady, sonyń barlyǵyna bir jerden, «bir tereze» qaǵıdaty boıynsha aqparat beriletin bolady. Osynyń arqasynda ınvestorlar da, otandyq bıznes te ózderiniń strategııalyq jumystaryn uzaq merzimge josparlaı alady. Sondyqtan osyndaı jaǵdaı jasaý úshin zańnamalyq ózgerister kerek», - dedi Sultanov Úkimet otyrysynan keıingi baspasóz máslıhatynda.
Aıta keteıik, búgin Premer-Mınıstr Baqytjan Saǵyntaev úkimetten preferentsııa surap alyp, otandyq ónimderdi almaıtyn kompanııalardy qatty synady. Osyǵan baılanysty ol bir aptanyń ishinde «Samuryq-Qazyna» qoryna kiretin kvazımemlekettik kompanııalardyń satyp alýlaryna qatysty ortaq erejelerdi ázirleýdi tapsyrdy.
Aǵymdaǵy jyldyń birinshi toqsanynda qarjy mınıstrligi tıisti zań jobasyn daıarlaýǵa mindetti .
